ORANJESTAD, Aruba: E evento “MetaFit 2018” a termina diadomingo mainta despues di un programa di 7 siman, cu 12 evento di caminata y coremento. Pa 7 siman largo empleadonan y participantenan a train y prepara nan mes 2 biaha pa siman p’e caminata grandi di MetaFit cu tabatin 3 categoria, cu distancia di 5KM, 10KM y 15KM.
Diadomingo dia 1 di Juli e preparacionnan a cuminsa for di trempan pa warda e participantenan yega pa cana y core den e Caminata MetaFit 2018, cu a conta cu participacion di 1000 hende. Pa e comision organisado, tabata 7 siman largo cu 12 evento di preparacion p’e caminata grandi y na mes momento nan tabata contento con tur cos a cana.
Na final di e evento Eddie de Veer, CEO di MetaCorp a entrega tur ganado nan premio di e 12 caminatanan di 7 siman y tambe e Caminata MetaFit 2018.
MetaCorp ta contento cu e exito di e programa durante 12 eventonan di caminata. Tambe ta contento cu e sosten di IBiSA, Polis, iRun, Patrishi Sports y boluntarionan cu a haci e eventonan posibel.
Devin de Veer di MetaFit Committee a expresa cu nan a ricibi elogio so despues di e evento. E aña aki a conta cu 1000 participante y asina mes hopi hende tabata puntra riba Facebook con nan por participa na e evento di MetaCorp. Lo evalua awor pa hisa e cantidad di participacion pa otro aña, asina Devin de Veer a splica. MetaFit Committee ta cla p’e caminata di otro aña y esunnan cu kier participa pa nan ta na tempo, pasobra esun di e aña aki tabata un evento ‘sold out’.
E comision ta gradici tur esunnan cu a haci e evento aki posibel, cu ta Arubaanse Padvinderij, iRun, Patrishi Sports, Eric Gomes, SV Dakota, SV Coca Cola Nacional, SV RCA, ATCO Indians, Grasshoppers y e Motor Unit di Polis. Tambe a gradici boluntarionan di MetaCorp kendenan a dicidi di no core pero yuda haci tur esaki posibel. “Danki, pasobra sin boso nos lo no ta aki aworaki”, asina Devin de Veer a expresa.
