ORANJESTAD — Gabinete Wever-Croes ta trahando riba crea mas y miho oportunidadnan pa nos futuro generacionnan. Nos ta construyendo e fundeshi pa un pais cu ta trece bienestar y progeso pa tur cuidadano. Prome Minister Evelyn Wever-Croes ta indica cu esaki Gobierno lo haci basa riba dos pilar importante: 1) Bon gobernacion y 2) Finansas publico saludable.
E pilar di BON GOBERNACION ta basa riba un departamento nobo di gobierno, Departamento di Integridad, caminda cada cuidadano por yega cu su preocupacion y su keho, caminda lo traha riba concientisacion den nos aparato gubernamental y den nos comunidad, caminda cu a traves di innovacion lo garantisa integridad di gobierno en general, tanto pa e funcionarionan cana riba e linea recto semper, como pa ningun hende no autorisa por mishi cu e procesonan, y pa e informacion cu gobierno tin di cada cuidadano, wordo trata cu e confindencialidad cu mester tin. E fundeshi di BON GOBERNACION lo ta basa tambe riba un Camara di Integridad, cu lo garantisa cu decisionnan di gobierno ta di acuerdo cu principionan di integridad.
E di dos pilar di FINANSAS PUBLICO SALUDABLE ta poni den nos Memorandum Financiero Economico, den cual ta baha gastonan di gobierno, especialmente gastonan di personal, y mes momento ta percura pa mas entrada na momento cu tur hende paga nan fair share na gobierno.
Prome Minister: “Minister di Finansas y ami ta encabesa e trabounan di reforma di belasting, creando asina un sistema di belasting husto. E sistema di belasting cu nos ta trahando riba dje lo brinda excepcion pa productonan di prome necesidad, manera lechi y pan y e lo ta un sistema sin e efecto cumulativo. E lo ta un sistema den cual e peso lo wordo reparti riba mas hende, riba turistanan y esnan cu ta traha ‘zwart’. Esey lo permiti nos haci e peso riba nos cuidadanonan menos”.
E dos pilarnan aki lo forma e fundeshi riba cual Gabinete Wever-Croes ta construi un pais pa nos futuro generacionnan. Y den esaki e ser humano lo wordo poni central.
Lo desaroya nos economia pa crea cupo di trabou. Turismo lo wordo diversifica, y Agricultura, sigur na un forma mas innovativo, lo ta un pilar economico importante. A traves di e proyecto AREA lo trece bek bida den centro di Playa y San Nicolas. E binida di e Fast Ferry na San Nicolas lo crea oportunidadnan nobo y unico pa San Nicolas y Aruba den henter Caribe.
Lo enfoca riba modernisa y innova nos enseñansa pa di e forma aki trece e animo positivo bek den nos cuerpo di docente, y pa nos logra mas graduado y menos ‘drop outs’.
E tramitenan pa construi e scol nobo di Mavo/Havo/Vwo na Noord ya a cuminsa. Y aña escolar lo habri cu e Bibliobus bek riba caminda, y tambe un Mobile Maker Space. Un bibliobus biew cu a wordo remodela, ekipa cu computer y tecnologianan moderno, pa brinda hobennan oportunidad pa explora cu tecnologia, manera cu un 3D printer. P’asina di jong caba, entusiasma nos hobennan pa tecnologia pasobra ta eynan nos futuro ta.
Nos cuido di salud lo wordo mehora, y pronto nos yiunan di tera cu studia medicina den region, por practica na Aruba, brindando asina mas y miho cuido medico na nos comunidad.
Esnan di menos recurso ya a cuminsa haya e atencion cu mester, a traves di e Crisis Plan Social, a traves di construccion di 200 cas social, y a traves di areglo di pago favorable cu WEB y Elmar na esnan cu nan conexion di coriente a wordo corta.
Prome Minister Evelyn Wever-Croes: “Di e forma aki nos ta construyendo un pais cu oportunidadnan nobo pa tur cuidadano, cu progeso y bienestar pa tur”.