Parlamentario di partido POR, Alan Howell ta indica di ta sumamente satisfecho cu e ultimo desaroyo pa loke ta construccion di casnan social. El a uni su mes na e lider di Fraccion di POR, Marisol Lopez-Tromp den e declaracionnan cu ta indica cu e acuerdo cu Minister di Infrastructura, Otmar Oduber a firma hunto cu FCCA pa construccion di casnan social ta algo sumamente positivo.
Howell ta indica cu e acuerdo pa construccion di casnan social ta un gran logro cu ta pone un biaha mas e hende central unda ta duna e atencion necesario na esnan di menos recurso. E acuerdo aki ta uno cu no solamente ta encera un proyecto infrastructural, pero tambe ta involucra e parti social y hudicial, entre otro, unda e meta ta pa logra crea hogarnan na diferente parti di nos isla.
Durante 8 aña largo ex minister Sevinger no a duna e atencion na esnan cu mas tabatin mester den nos sociedad, mas bien a concentra riba otro tipo di cosnan cu mas bien tabata beneficioso pe y pa un grupito cerca di su persona, lubidando cu su rol tabata pa traha na bienestar di henter pueblo.
Contrario na e maneho di clase aki, Minister Otmar Oduber den di 7 luna ta ‘walk su talk’ y ta traha duro na bienestar di pais Aruba, Parlamentario Alan Howell ta indica.
Finalisando el a expresa tambe cu e acuerdo aki unda ta cuminsa construccion di un serie di casnan social ta algo positivo pa stimulacion di economia di Aruba, unda cu un cantidad di hende lo por bin na remarca pa haya trabou, mientras cu ta un manera pa stimula tambe inversion di sector priva.