Mike Eman ta mescos cu Costas Simitis di Grecia, hendenan cu a hundi nan Pais
Parlamentario Endy Croes ta splica cu e tin un duele enorme na su curason riba un dia manera awe unda cu mester a introduci un Crisisheffing pa asina por cuminsa paga debenan cu a nan a hereda di Mike Eman y AVP . Despues cu Coalicion a tuma e timon over diabierna 17 di November 2017, e dia exacto cu e gobierno a huramenta pa compromete nan mes cu e encargo, a drenta Cocolishi dialuna 20 di November 2017 como nan promer dia oficial na trabao. Kico nan a encontra? Algo nunca bisto. Un Cocolishi bashi bashi sin ningun documentacion pa por continua cu gobernacion pero tampoco ningun computers, lessenaar, stoel etc. Pa refresca nos memoria, computers y camaranan digital a wordo horta te cu esnan aparentemente culpabel a wordo cera. No ta tur a wordo cera pasobra algun a core trece computers bek. Hasta ex-minister Schwengle a manda carta via abogado cu e kier paga pa Flatscreen y computers cu nan tambe a “presta”.
Un gobierno di set shouro
Akinan por a conclui mesora ki tipo di gobierno a maneha Aruba ultimo 8 añanan. Un gobierno di un set di “shouro” y “chollers” unda Mike Eman a permiti pa tur cos cu ta contra Ley por a sosode manera ta algo masha normal. Nan a HORTA e pais aki den gran forma y a endeuda e pais aki di tal forma lagando atras un “DESASTER FINANCIERO”. Costas Simitis, ex-Presidente di Grecia a causa algo por igual na Grecia cu ayudo di Goldman Sachs Investments Bank kendenan a yuda hasta sconde cifranan causando un Statistics Economic Misreport y un deficit to GDP ratio di mas di 120% cabando cu nan pais y a pone e pais bati bancarota. Mike Eman a expresa cu e si ta orguyoso di e debe y e debe t’ey pa nos tur bay pag’e den futuro. Mike Eman y AVP a redobla e debe di e pais aki y esaki a keda confirma recientemente den Juni 2018 cu palabranan di Raymond Knops Staatssecretaris y Raymond Gradus presidente di CAFT. Debe Nacional a redobla di 40% pa 90%. Den 2018 Aruba lo paga 216 MIYON na interes di placa presta pa Mike Eman y esaki ta igual cu 600 mil florin pa cada dia. Mike Eman a regala e pueblo aki un bunita recibo di proyectonan PPP (Pa Pueblo Paga) di 25 aña na 80.7 MIYON pa aña.
Hortamento sin fin
Pues awor cu nos ta cuminsa paga ainda Mike ta grita cu awor pueblo ta wak unda su placa a bay. Que tristesa!!! Mike Eman a regala su amigonan den prensa 89 MIYON. Mike Eman a regala su amigonan abogado pa deskundig advies 112 MIYON. Mike Eman a aumenta gastonanan di personal cu 80 MIYON. Esakinan el a yama BON TRABAO!! Mike Eman a laga Benny Sevinger “HORTA” terenonan di e pais aki y via su amiga di radio a bende mayoria, entre otro cu Spañonan y Venezolanonan. Enrikece nan mes riba custia di pueblo. Tur ta na OM y ta di spera un accion rapido di OM al respecto. Pa esaki Mike Eman a bisa pueblo na 2013: Ainda Falta! Pues si no ta pa e desasternan aki awe nunca pero nunca mester a bin cu cierto ahustenan. Nos lo bay pasa den un momento poco dificil pero na mesun momento aki gobierno ta trahando cu alma y cuerpo pa introduci un sistema di belasting mas husto pa pueblo entrante 2019 pa asina mitiga e peso.