Minister mr. Xiomara Ruiz-Maduro: GOBIERNO TA TRAHANDO PA RECOBRA E CREDIBILIDAD FINANCIERO DI NOS PAIS

ORANJESTAD – E trabou duro y persistente di Gabinete Wever-Croes riba e tereno financiero bao di maneho di Minister di Finansa, Asuntonan Economico y Cultura ta duna su fruto. Gobierno di Aruba ta reestableciendo credibilidad financiero. Algun siman atras Standard & Poors, cual ta un compania di rating cu ta evalua e credibilidad financiero di nos pais a bin Aruba y a scrutina nos pais, a papia cu tur e stakeholders importante y siman pasa Standard & Poors a informa gobierno di Aruba riba e resultado cu nan ta  bay di acuerdo pa afirma e rating BBB+ pa pais Aruba. Segun minister Ruiz-Maduro esaki ta encera cu pais Aruba ta keda disfruta di locual ta un pais caminda bo inversionnan ta sigur.

E mandatario tambe a informa cu mester bisa si cu pa locual ta e outlook, esta miras pa futuro nan a cambia di stabiel pa negativo, esaki tin di haber cu e refineria cu no a cuminsa cu su proceso ainda, e economia di nos pais cu ainda ta delicado y mas cu claro e debe astronomico ta pone un dificultad pa nos pais.

Apesar di esaki Standard & Poors hunto cu otronan ta reconoce e hecho cu pais Aruba a conoce un gobierno nobo cu ta tratando e retonan na un manera hopi serio. Esaki ta brinda e confiansa na nan pa laga pais Aruba na e status di inversion.

Esaki sigur ta muestra cu trahando hunto cu seriedad nos ta logra recobra e credibilidad financiero, e credibilidad cu ta trece e beneficio pa e pueblo di Aruba segun minister Ruiz-Maduro.