Esunnan cu ta bay haya e sla mas formal dor di e medidanan di gabinete Wever Croes, ta esunnan vulnerabel den nos comunidad y sigur e pensionadonan cu tin un entrada fiho y pa nan por bay hisa e entrada aki mester bay haci un trabou extra y nan mester bay corta gastonan cual nan no tin caminda pa corta mas y den e edad cu nan ta, hopi biaha ta dificil pa nan bay haci un extra trabou, Parlamentario Benny Sevinger di fraccion di AVP ta declara.
Sr Sevinger a sigui mustra cu e unico cos cu ta keda e pensionadonan ta di mira con parti di nan entrada ta bay pa gobierno cu tur consecuencia cu esaki lo tin pa nan, ya cu e lo afecta hasta nan sistema di come, consecuentemente e lo afecta nan salud, nan cu mira con ta bay paga luz y tur esaki ta conduci na un deterioro social den e grupo aki.
“Ya caba pensionadonan a wordo confronta c’un situacion similar cu gobierno di Nelson Oduber na 2007 y 2008, caminda no ta por nada cu AVP a drenta gobierno, nos a kita gran parti di e BBO.
Ta bon pa nos mustra riba un articulo cu nos lider di AVP, sr Mike Eman a publica recientemente y caminda su persona ta bisa bon cla:
“ex Prome Minister Mike Eman preocupa cu pakete di medidanan, mas di 12000 pensionado ta bay perde nan reparatietoeslag.”
MEP mesora ta reacciona y bin bisa cu ‘Mike Eman ta gaña’ pasobra dia 1 di juli, gobierno NO ta bay kita reparatietoeslag di ningun hende, di ningun pensionado pero kico nos ta mira cu den e articulo, Mike Eman no ta bisa ningun caminda, e fecha di 1 di juli gobierno lo kita e reparatietoeslag di ningun pensionado.
Den e articulo e lider di AVP ta menciona cu pa dia 1 di januari 2019 pensionadonan lo perde nan reparatietoeslag, manera cu e ley cu gabinete Wever Croes a pasa ta bisa y caminda sr Eman a publica e paragraf di e ley cu ta confirma esaki.
Den e ley ta para lo siguiente:
“de inkomstengrens wordt gesteld op het bedrag bedoeld in artikel 7, eerste lid van het Landsverordening Algemene Oudersdom, en dat is1107 guldens, het pensioen voor een alleenstaande.
Voor degene die in totaal meer dan het bedrag bedoeld in artikel 7, eerste lid, van het Landsverordening Algemene Oudersdom Verzekerings geld hebben, dat zij per 1 januari 2019, geen recht meer zullen hebber op het reparatietoeslag.”
Cu otro palabra, gobierno aki a pasa un ley cu TUR pensionado cu ta cobra mas cu e ley ta bisa pa un ‘alleenstaande’ cu ta e suma di 1107 florin, pues si e pensionado tin entrada di 1108, su number a hunga of 1109, 1110 of 1120, e lo no bin na remarca pa e reparatietoeslag mas.
Esey segun nos calculacion a base di cifranan cu nos tin, ta un grupo di 12.000 pensionado ta over di e suma di 1107 florin aki.
E ley cu gobierno a pasa ta bisa cu e pensionado no tin derecho pa ricibi reparatietoeslag desde prome di januari 2019, pues pa un di januari otro aña, e lotto di gabinete Wever Croes ta hunga pa e pensionadonan aki.
Pues atrobe cu ta troce e berdad, gaña nos pensionadonan un biaha mas dor di bisa cu sr Eman ta gaña boso y cu nan lo no perde nan reparatietoeslag pa 1 di juli 2018, loke ta corecto, pero si ta 1 di januari 2019 nan lo perde esaki.
Esey e ley ta bisa y tanten cu e ley aki ta asina, y fraccion di AVP a entrega un mocion , un amienda durante tratamento di presupuesto, pa cambia e articulo aki pa nos pensionadonan no perde nan reparatietoeslag y kico a pasa, e fraccionnan di gobierno a vota contra di e amienda aki.
Kiermen no ta un cos cu nan no sa, cu nan no ta na altura di dje, cu nan ta bay masacra un gran parti di nos comunidad casi 12 mil pensionado cu lo perde nan reparatietoeslag ya cu fraccion di AVP a bisa esaki, a entrega un mocion y un amienda pa cambia esaki, pero esaki a wordo nenga esaki. Ta nos hendenan cu mester di e placa aki, ta facil pa kita placa for di pensionadonan, facil pa kita nan reparatietoeslag y sr Eman a splica bon cla pakico gobierno di AVP a bin cu e reparatietoeslag aki pa yuda nos grandinan,” Parlamentario Benny Sevinger a declara.