Diahuebs pasa tabata un dia hopi grandi pa San Nicolas y henter Aruba na momento cu a desvela e obra di arte ‘Lolita’ na e plaza pabou di postkantoor.
Parlamentario Alan Howell tabata presente na e momento special aki unda cu atraves di ‘Lolita’ a reconoce tur hende muhe humilde cu a traves di nan trabou diario a sa di hiba nan famia dilanti.
Manera ta conoci, e desvelo di Lolita mester a tuma lugar for di basta tempo caba, despues cu nos artista local Gilbert Senchi tabatin e honor di realisa e bunita obra aki, pero pa motibonan politico e gobierno anterior a dicidi di no desvela e obra di arte.
Awo bou maneho di Gabinete Wever-Croes por mira e interes grandi entre e mandatarionan pa en berdad haci di San Nicolas un berdadero centro historico cultural y den esaki Lolita ta forma parti di dje.
Alan Howell ta remarca cu e obra di arte di Lolita como un hende muhe Afro-Caribense humilde cu a traves di benta di su cos dushinan y biyechi a sa di hiba su famia dilanti, ta representa hopi hende muhe balente cu a y ta sigui forma parti di nos comunidad. “E hende muhernan aki ta un ehempel pa nos comunidad, nan ta traha incansablemente pa hiba nan famia dilanti y e sodor riba nan cara y cansancio di nan curpa ta wordo recompense na momento cu nan yiunan ta bay dilanti y den varios caso ta bira ciudadanonan ehemplar den nos comunidad”.
Parlamentario di POR kier a felicita gobierno pa e bunita reconomento aki y tambe e famianan di Lolita cu di awo en adelante lo tey presente na San Nicolas pa recorda e balor di un hende muhe balente y dedica na su famia.