Crisisheffing temporario lo wordo elimina
Gobierno di Aruba, na mes momento cu a anuncia cu lo bin cu un crisisheffing temporario, a compromete tambe cu pronto lo haci esaki desparece cu e Reforma di Belasting. Prome Minister Evelyn Wever-Croes durante conferencia di prensa di Gobierno a elabora mas riba esaki.
Gobierno anterior a haci su parti pa loke ta trata reforma di belasting y a introduci un proyecto di ley cu ta yama ABB. Sinembargo, nunca Gobierno anterior tawata tin e determinacion y compromiso politico pa introduci e ley aki.
Una bes cu Gabinete Wever-Croes a drenta gobierno, a bay bek pa investiga loke cu e Gobierno anterior a laga atras pa loke ta trata e ley aki. A reuni cu mayoria di grupo involvi faltando ainda dos organisacion importante cu ta ATIA y AHATA. A ripara cu e sosten pa e ABB manera e Gobierno di AVP tawata tin’e, poco poco a cay. Di un banda, Prome Minister ta bisa cu esaki ta di lamenta pasobra lo tawata mas facil si Gobierno por a sigui cu esaki.
Desde cu a introduci BBO na 2007, nunca a traha pa mehora esaki y bin cu ‘vrijstelling’ pa productonan di nesecidad manera pan. Gobierno anterior a bisa cu e lo elimina BBO. Pero e no a elimina e BBO y tampoco a bin cu cambionan cu por a trece alivio riba productonan di prome necesidad. Tampoco e Gobierno di AVP a haci niun intento pa elimina e sistema acumulativo di belasting. Gabinete Wever-Croes kier trece cambio pa mehora e sistema di belasing aki.
Gobierno kier yega na un sistema di belasting mas husto. Caminda cu e lombanan mas hancho ta carga pa e lombanan mas smal. Kier yega na un forma di belasting mas senciyo y efectivo y cu no ta complica pa cumpli cu n’e. Y loke tambe ta importante ta cu kier yega na un sistema di belasting na unda cu gobierno ta haya su parti lihe y na tempo sin cu esaki ta dificil pa e cen drenta.
Den e cuadro aki, kier baha e loonbelasting y especialmente e inkomstenbelasting cu por trece hopi situacionnan inhusto cu nan. Un pensionado por ehempel cu tin mas di un pensioen por haye cu debenan halto pa paga. Aki lo bay trece cambio.
Tambe Gobierno kier un belasting indirecto pa reemplaca BBO, BAZV y ohala, Prome Minister ta expresa, cu esaki por reemplasa e B-AVP tambe. E sistema di belasting aki mester crea un espacio pa trece excepcion pa entre otro productonan di prome necesidad, manera pan. Esaki lo elimina e discusionnan riba e tema di pan pasobra e lo tin dispensacion den e sistema di belasting nobo.
Un otro cambio cu e sistema indirecto di belasting lo trece ta cu e lo no ta acumulativo mas manera actualmente nos tin. Esaki ta ora cu cumpra un producto, por ehempel pan, si cumpra wholesale, bo ta paga BBO, y e retail, cu ta e supermercado chikito bende, e tin di paga atrobe pasobra e ta acumula. No por haci esaki durante aña, pero mester warda un aña nobo cuminsa pa haci esaki.
“Esaki ta e cuadro di e Sistema di belasting cu Gobierno di Aruba ta bay introduci. E nomber pa e belasting aki ta keda pa yena te na final. Esnan envolvi ta trahando duro pa logra e cambionan prome cu fin di aña aki na unda cu Aruba por habri un aña nobo cu un sistema di belasting reforma y asina por elimina e crisisheffing y trece alivio pa nos comunidad”, Prome Minister Evelyn Wever-Croes ta bisa.