Recientemente un delegacion di Aruba consistiendo di Minister di Turismo, Salubridad y Deporte, Sr. Danguillaume Oduber, Conseheronan di Minister Sr. Gerald Tsu y Sr. Sven Faarup, Sra. Ronella Tjin Asjoe-Croes, Sra. Sanju Luidens-Daryanani y Sr. Ed Malone di Aruba Tourism Authority, Sra. Tisa LaSorte di Aruba Hotel and Tourism Association y Sra. Jo-Anne Arends di Aruba Airport Authority a reuni cu JetBlue na New York. Anualmente ta tuma e tempo pa reuni cu socionan clave, unda por, y a combina e reunion aki cu un serie di otro reunionnan.
Di parti di Jetblue e delegacion a consisti di Sr. John Checketts, Vice President di Network Planning, Sr. Jack Massey, Senior Analyst di Route Planning, Sr. Andrea Lusso, Director di Route Planning, Sr. Eric Tanner, Senior Analyst Loyalty Marketing, Sra. Heather Berko, Manager Advertising Content & Social Marketing, y Sra. Wendy Jeungerkes, Regional Market Manager di Caribbean di JetBlue Vacations.
JetBlue a cuminsa bula pa Aruba na aña 2006 cu vuelonan for di Boston. Awe, 11 aña despues, JetBlue a crece y bira un di e socionan strategico mas grandi pa Aruba, contribuyendo grandemente na nos industria turistico, percurando pa buelo for di mercadonan clave manera New York y Boston, como tambe percurando pa mas diversificacion cu buelo for di Fort Lauderdale. JetBlue ta ofrece “non stop” flights di tres diferente gateways Boston, New York y desde 2017 Fort Lauderdale.
Na 2017 y 2018, Jetblue a sigui expande capacidad cu introduccion di buelonan adicional y buelonan cu nan servicio “business class” pa medio di nan producto ‘JetBlue Mint Premium’ cu ta opera cu un avion mas grandi – un Airbus 321 (Business and Coach).
Jetblue a expresa di ta sigui di ta hopi contento y satisfecho cu desaroyo di Aruba y e buelonan. Refleho di nan expansion continuo ta resultado di e demanda fuerte pa Aruba y di exito di expansion y introduccion di servicio nobo. Di Boston pa Aruba ta nan destino mas fuerte.
Despues di trabou duro den ekipo, JetBlue a un biaha mas anuncia cu lo sigui expande y lo añadi servicio adicional for di Boston. E aerolinea lo añadi 2 frecuencia mas for di Boston entrante ultimo cuartal di 2018, cu continuacion den 2019.
E mercado di Merca ta sigui ta fuerte. A sera 2017 cu un crecemento di 10.6%, unda tur region den e mercado a crece. Te cu Mei di e aña aki e mercado a mustra un crecemento di 7%. E mercado di Merca a mustra un crecemento consistente for di 2011 en adelante, cu un crecemento averahe anual di 3%. Un crecemento di ‘Tourism Receipts” di 6.5% pa Aruba aña pasa ta pa gran parti atribui debi na e demanda y empuhe fuerte for di e mercado Mericano.
Minister di Turismo ta felicita A.T.A., AAA, AHATA y tur otro cu ta traha incansablemente pa haci di Aruba su esfuersonan riba area di Turismo y aviacion un exito.