ORANJESTAD – Durante e ultimo 2 añanan Aruba Airport Authority N.V. (AAA) tabata bastante ocupa cu e trabounan pa cuminsa cu e proceso di modernisacion y expansion di Aeropuerto Internacional Reina Beatrix; cu awe ta wordo referi na dje como e Proyecto Gateway 2030.
Como parti di e proceso aki, e financiamento necesario y recuperacion subsecuente di e debe a wordo tuma den consideracion serio pa e planeamento di e proyecto. Pa por financia e inversion adecuadamente, a keda determina cu un aumento den Aeropuerto su tarifanan y cobransanan “Airport Charges” ta necesario.
AAA a tene varios reunion di consulta den e aña tras di lomba cu tanto e stakeholdernan local y internacional, incluyendo e aerolineanan cu ta partner y tambe un ekipo di IATA (International Air Transport Association) pa discuti e aumentonan y tambe e motibonan di e inversionnan.
Como resultado di e discusionnan aki, tur stakeholder di Aeropuerto y aerolinea envolvi a mustra nan sosten completo na e Proyecto Gateway 2030 y e costonan envolvi cu ne.
AAA su aerolineanan partner, den colaboracion cu nan asociacion di industria, IATA, a bai di acuerdo cu un aumento den e costonan di pasahero relaciona cu aeropuerto (passenger related airport charges) pa sostene e financiamento di e proyecto. AAA lo implementa e aumento den 2 componente di e tarifanan actual di e airport passenger related charges. Esaki lo resulta den un aumento di e tarifanan actual pa buelonan NON US cu $13.- y buelonan US cu $15.-. E aumentonan aki lo wordo cobra na e aerolineanan y e ta keda na e aerolineanan si of con nan lo kier recobra e suma aki for di nan pasaheronan; cual lo varia pa cada aerolinea. E ta importante pa menciona, cu esaki ta e prome aumento den e cobransa di aeropuerto desde 2003. E tarifanan di cobransa pa Curacao y Bonaire no lo conose cambio, pues lo keda mescos.
Adicionalmente a bai di acuerdo cu e aerolineanan den un MOU formal cu si e costonan di e proyecto ta menos di loke a premira den e budget, AAA lo re-evalua e tarifanan di e passenger related charges y baha nan si mester.
E tarifanan nobo a wordo compara den e region di Caribe y asina mes cu e aumento e tarifa di AAA ta cai den e averahe pa e region y significadamente mas abou compara cu otro aeropuertonan den region cu tambe tin e facilidadnan di US Customs pre-clearance.