Diahuebs benidero Aruba lo bay pasa pa historia na momento cu desvela e estatua di Lolita na San Nicolas.
Parlamentario di POR, Alan Howell a expresa cu Lolita tabata un señora hopi keri pa masha hopi hende na Aruba, specialmente na San Nicolas. Un señora cu a traha duro bendiendo su cos dushinan y su biljetjie pa e por sobrevivi y cria su yiunan. Un mama balente, un señora cu ta un ehempel cu a demostra con un persona humilde a traha duro y hiba su famia dilanti.
Diahuebs awo gobierno ta bay reconoce Lolita, haciendo di esaki un momento historico pasobra esaki ta pa prome biaha den historia di nos isla cu un escultura ta wordo traha pa reconoce un persona humilde, no un persona cu ta den politica of cu a traha himno of cu a hiba un lucha pa Pais Aruba. Ta reconoce no solamente un persona humilde, pero un hende muher cu a demostra cu a pesar cu e no tabatin educacion halto a sa di traha di mainta te anochi pa hiba su yiunan te caminda cu nan ta awe.
“Un pabien grandi na e pueblo di San Nicolas. San Nicolas ta hopi contento cu un reconocemento asina aki. E estatua ta bay ta pabou di postkantoor riba e plaza y lo ta great pa tur hende por ta presente ora honra un señora hopi keri y ta e manera cu nos tur lo por keda corde y e efecto cu e tabatin riba bida hopi di nos for di tempo cu nos tabata chikito y un ehempel pa hopi hende muher cu no tabatin un casa banda di nan”, Alan Howell a conclui.