Parlamentaria di POR Marisol Lopez-Tromp Ley di LMA mester wordo revisa y adapta na nos situacion actual

Un di e aspectonan cu ta hayando hopi atencion den e dianan aki ta reduccion di gasto di Gobierno y den e cuadro aki ta toca e tema di reduccion di personal.
Lider di Fraccion di POR, Marisol Lopez-Tromp a expresa cu gasto di personal ta un paso cu Conseho di Minister ta tuma siguiendo conseho cu CAFT a bin ta duna pa basta aña caba y tambe pa mehora efectividad di aparato publico.
Parlamentario di POR ta considera cu loke ta importante relaciona cu e tema aki ta e ley di LMA, Landsverordening Materieel Ambtenarenrecht, e ta e curason cu ta toca e trabounan y derechonan di tur ambtenaar na Aruba. Esaki ta e prome aspecto cu mester traha riba dje pa trece e cambionan y logra e meta pa tin un aparato gubernamental efectivo caminda cu e ambtenaarnan ta wordo evalua. Es decir, mester adapta e LMA na e demandanan y exigencianan di actualidad.
Den e mesun rosea, e parlamentaria a bisa cu Parlamento a aproba un crisisplan social cu ta costa 17 miyon. Pa por yuda criaturanan cu ta den dolor cu ta wordo maltrata, abusa y neglisha mester di personal specialisa den e areanan aki, manera mucha, famia y sociedad.
Loke por a wak ultimo añanan, durante gobernacion anterior, ta un cantidad di coordinador nombra na bestuurskantoor y mas bien pa haci cierto trabounan politico, pero e departamento mes, cu ta e curason no a haya esaki. Ta netamente e departamento ta rekeri e toma di personal y pesey mes gobierno actual ta haciendo esaki. E ta un escogencia conciente pa por cura un herida grandi cu tin den nos comunidad y cu a wordo neglisha durante ultimo añanan, unda a yega asina leu cu esnan di e departamento mes no tabata wak e minister, nan tabata tende di dje na radio ora decisionnan tabata wordo tuma pa nan.
Awor a bin un refocus di kico ta importante pa nos comunidad y si ta rekeri toma di personal pa cura esaki y preveni e dolornan cu tin den comunidad, lo tuma e pasonan ey pasobra Parlamento a aproba e presupuesto pe.
Di otro banda, caminda cu tin funcionnan cu no ta necesario, manera ta e overtolligheidspool cu hendenan cobrando por nada na cas, sea nan ta wordo reubica of ta termina esaki.
Igualmente e ta bisa cu cada minister tin un responsabilidad y e no por nombra un persona si no tin vacatura pe, si e no tin un conseho positivo pe di Departamento di Recursonan Humano y si no tin placa pe for di Finansas. Den añanan cu a pasa hendenan tabata wordo nombra sin tene cuenta cu esaki y gobierno actual, si e nombra hende mes, ta pasobra tin necesidad y mester tin un conseho positivo.
Di e forma aki Marisol Lopez-Tromp a mustra e diferencia grandi entre gobierno anterior y actual pa loke ta trata maneho di personal, mientras cu e ta considera cu loke ta hopi importante relaciona cu e tema aki ta e ley di LMA cu mester wordo revisa y adapta na nos situacion actual.