Durante Celebracion na Club Sportboys na Angochi
ORANJESTAD – Diadomingo dia 24 di juni ultimo, minister Xiomara Ruiz-Maduro hunto cu empleadonan di Departamento di Cultura a organisa un paseo bishitando e Celebracion di Fiesta di San Juan Dera Gay den diferente barionan pa asina sostene y promove nos tradicion cultural.
Durante e celebracion di Dia di San Juan na Club Sv Sportboys Aruba na Angochi, minister di Cultura a haci entrega di un reconocemento na sr. Dabian Evaristo Rasmijn, mihor conoci como Nai Rasmijn pa su sosten y su organisacion di e celebracion di Dia di San Juan ‘Dera Gay’ na Sportboys.
Señor Nai Rasmijn a cuminsa baila deramento di gay cu edad di 17 aña. Ela wordo inspira door di señor Jan Geerman kende despues a bira su suegro. Nai Rasmijn a cuminsa baila y competi pa campeonato di Dera Gay y a sali 5 biaha campeon. Nai a baila y competi 2 bes na veld di Trappers, 1 bes na Centro di Bario Noord y Seri Noka y 5 bes na Club Sportboys.
Y di e tempo ey Nai Rasmijn a wordo pidi pa yuda y organisa den pit di Sportboys. Nai a wordo pidi tambe hunto cu su señora Candy Rasmijn dfm, pa duna un show di baile y tambe e tabata yuda den pit despues di e shownan di baile na Centro di Bario Brazil, na Centro di Bario Tanki Leendert y riba Plaza Betico Croes. Nai semper a stima su cultura y tradicion.
Nai tin 51 aña organisando e celebracion di Deramento di Gay y mayoria bez esaki a tuma lugar na Club Sportboys. E aña aki club Sportboys ta cumpli su 60 aña di existencia y e club a wordo funda tambe pa Tata di Nai Rasmijn, señor Epifiano (Fanny) Rasmijn dfm.
Minister Xiomara Ruiz-Maduro den su discurso a expresa palabranan di danki y pabien na señor Nai y cu Dios por brinde hopi aña mas yena cu salud pa e por keda organisa, participa y yuda nos Pueblo biba nos cultura.