ORANJESTAD– Den ultimo dianan por tuma nota cu lider di Partido AVP Mike Eman a lanta cabes y ta bruhando tera formalmente. Si Mike Eman ta cuestiona cosnan cu ta berdad, e no por wordo critica pa haci asina. Pero ora cu e ta cuestiona cosnan a base di mentira, e ora si mas cu claro mester para e mentira.
Gobierno di Aruba kier enfatisa un biaha mas, pensionadonan no ta bay perde Reparatietoeslag manera cu señor Eman ta indica. Entrante prome di july, Reparatietoeslag di tur pensionado lo subi di cien florin pa 125 florin pa luna. Esaki ta e decision cu Gobierno di Aruba a tuma y ta den ehecucion.
Gobierno di Aruba ta haci un apelacion na pensionadonan pa no cay den trampa di señor Eman. No cay den mentira di señor Eman cu ta basa solamente riba manipulacion. E Reparatietoeslag lo aumenta pa tur pensionado. Mike Eman por kere cu e por sigui gaña nos pensionadonan, pero nos pensionadonan si te ainda ta corda con señor Eman a gaña nan. Nan ta corda ainda con señor Eman a kita Gelijkbedrag y e Bashipremie. Sumanan cu Mike Eman a kita for di e pensionadonan pa asina e por a haya mas placa pa e por a malgasta na biahamento y fiestamento. Na un derochamento di placa sin fin. Y awe, ta di lamenta cu e pensionadonan mester biba sin e Bashipremie y sin e Gelijkbedrag.
Ora cu e Gobierno actual a pensa di bin y drecha esaki pa nos pensionadonan, a bin encontra cu un situacion financiero hopi mas malo cu por a imagina y cu ta stroba pa por coregi tur e erornan di Mike Eman. Pero pensionadonan ya no ta kere Mike Eman mas. E diesdos mil pensionadonan cu señor Eman ta referi na dje, lo no perde e Reparatietoeslag pero lo conoce un aumento di 100 florin pa 125 florin pa luna. Mike Eman semper a gaña nos pueblo y ta keda un mentiroso patologico.
Gobierno di Aruba ta haci un apelacion na pensionadonan pa no cay den trampa di oposicion. No cay den mentira di señor Eman cu ta basa solamente riba manipulacion. E Reparatietoeslag lo aumenta pa tur pensionado. Esaki ta e decision cu Gobierno di Aruba a tuma y ta den ehecucion.