Den tur e discusion cu tabatin relaciona cu e uzo di edificio MFA-Noord pa un reunion politico di AVP, ta un berguensa cu e politiconan aki, despues di a reuni siman pasa na San Nicolas, e biaha aki ta drenta e pueblo di Noord pa trata di manipula mente di e habitantenan aki. Sin duda cu e pueblo di Noord no merece bishita ni reunion di e politiconan oportunista aki di AVP, kendenan durante 8 aña largo a laga e pueblo aki benta un banda, ya cu fuera di construccion di e edificio MFA-Noord cu tin cu wordo paga ainda den e proximo 25 añanan, nada pero nada mas a ser haci pa e districto aki door di e gobierno di AVP. Echo ta cu e districto di Noord den bista di AVP ta solamente util pa haya voto den eleccion. No solamente ningun proyecto significante a ser realisa pa e pueblo di Noord, pero nan candidato di Noord ex-ministro Paul Croes a percura pa miles di ontheffingnan na stranheronan strobando asina nos propio hendenan local desemplea cu tambe ta biba den Noord pa nan por a haya un trabao decente pa cria nan famia. Ta esaki Mike Eman y su gang mester splica e pueblo di Noord den nan reunion di instigacion, odio y rencor di diamars awor.
Scol HAVO/VWO -Noord
Tambe ta e momento apropia pa den e reunion aki e habitantenan di Noord puntra Mike Eman dicon e y su gobierno a boicotia e construccion di e scol HAVO/VWO na Noord cu a ser laga atras pa Gabinete Oduber na final di 2009, caminda tabatin tur e financiamento, mapa, bestek completamente cla pa cu e proyecto aki. Si Mike Eman no a coy e placa pa construccion di e scol y no a hinca esaki den e proyecto fracasa di 4 tram na Playa, awe den juni 2018 e prome klasnan di VWO lo a gradua na e scol aki y esnan di HAVO lo a gradua for di aña pasa caba. Pakico Mike Eman a priva nos hobennan di Noord pa por acudi na enseñansa secundario den nan propio districto y a obliga nan di bay te San Nicolas pa por sigui nan estudio di HAVO of VWO? Tur e preguntanan aki Mike Eman y su ex-ministronan mester splica e pueblo di Noord den forma cla y raspa awe nochi.
Akgun proyecto di gobierno di MEP
Partido MEP un biaha kier enfatiza cu gobiernonan di MEP den pasado semper a percura pa proyectonan util y necesario pa e pueblo di Noord. Pa menciona algun: Compleho Deportivo Frans Figaroa, Sporthotel Angel Botta, Warda di Polis na Shaba, Scol Basico na Kudawecha, Centro di Pesca Hadicurari, e casnan di pueblo na Noord, tur e camindanan principal, henter e infrastructura di Plan Sasaki cu a ser desaroya caminda awe den henter e area aki tin un cantidad di hotel, condominio, restaurant, shopping malls, cinema, night clubs y otro lugarnan di entretenimento. Aki nos por mira claramente cual partido politico berdaderamente a yega di traha cu alma y curpa pa e pueblo di Noord y tambe tur e otro districtonan.
Pues na lugar di bay instiga e pueblo di Noord, Mike Eman mester duna cuenta di su fechorianan di su gobernacion y splica tambe pakico e pueblo di Noord no a disfruta net nada di e mas di 3 biyon florin extra cu Gabinete Eman a haya den e periodo di 2010-2017.