ORANJESTAD, Aruba – 21 di Juni 2018: Na e momentonan aki e academia di arte y diseño, Rietveld Academie Aruba, ta pasando den un situacion desagradabel. Parlamentario di Fraccion AVP, Michael Lampe, ta haya e situacion aki fastioso pasobra Minister di Enseñansa, Dr. Rudy Lampe a duna un señal cla cu no lo sigui cu e academia aki. E academia ta un specialisacion, unda studiantenan ta bin cu solucionnan pa comunidad.
Minister di Enseñansa no lo sigui duna subsidio p’e huur cu e academia tabata haya y el a duna diferente motibo. A bin cu iniciativa di scol di arte y esaki ta creciendo, unda ta creando diferente hoben den un academia di arte cu ta importante p’e comunidad di Aruba. Awo nan ta hayando un golpi grandi for di Minister di Enseñansa, kende supuestamente tambe tin arte, literatura, poesia y diferente otro forma na pecho. El a manda un señal cla cu esaki no ta e caso, probablemente pa presion di coalicion. Tambe como Minister di Enseñansa e no ta duna interes riba e importancia di e luga aki.
E edificio ta bunita, a nota con a embeyece Oranjestad, cu a duna un aporte grandi na desaroyo di e industria creativo. Varios turista ta pasa banda di e edificio aki, ta saca potret y mira cu studiantenan ta ocupa akinan. E edificio aki ta un monumento cu historia grandi. Den e edificio aki ta un bon luga cu por desaroya un academia di arte y diseño riba Aruba. Ta tristo pa mira cu no tin interes di Minister Lampe pa aporta, mantene y conserva un iniciativa cu hopi hende a traha duro riba dje. E studiantenan a dedica cu hopi pasion y amor na nan arte, na nan futuro, unda cu e academia aki ta duna nan e espacio.
“Si Minister di Enseñansa tabatin interes genuino na esaki, lo bo a duna sikiera un otro opcion cu ta cay den e sentido di e luga aki”, asina e Parlamentario a vocifera. Den diversificacion di economia ta papia di industria creativo, unda ta referi cu mester duna espacio pa diferente forma di educacion y e academia aki ta un specifico. Den e academia aki ta haya studiantenan cu den futuro lo crea ideanan nobo pa comunidad, pa bin cu innovacion den diferente ramo. Aki ta papia di diversificacion, industria creativo, sector creativo y tur ta cuminsa na scol di arte.
Tur esaki ta den nan programa, pero Gobierno ta papia un cos y ta haci otro. Minister a duna diferente excuus pakico no lo continua cu huur di e edificio di scol di arte. Ta paga huur di edificio, pero pafo tin un area priva cu e persona cu ta huur e edificio a duna p’e desaroyo di e parke dilanti scol. E area aki e studiantenan ta uza y na mes momento e parke ta embeyece y hisa e balor di e area cu turistanan ta cana. E studiantenan tambe a aporta na e embeyecemento, unda cu nan a mustra nan creatividad.
Parlamentario Michael Lampe ta considera e momento aki como tristo. E ta inaceptabel pa mira con Minister di Enseñansa ta kibra desaroyo di studiantenan. Academia Rietveld a demostra un posibilidad y potencial grandi pa otro studiantenan di region, cu ta bin studia na Aruba. Un biaha mas e demostra cu e interes no ta pa crea espacio pa tipo di educacion specialisa. Arubianonan cu a studia arte y diseño y a bay sigui studia na Hulanda, a haya un bon preparacion. Educacion manera esaki ta un rikesa y awo ta ruim op tur cos, pasobra Minister a duna di conoce cu no lo continua cu e subsidio di huur.