Parlamentario Endy Croes ta splica cu e ta masha desapunta di CAFT. Recientemente tin basta bay bin entre CAFT y Pais Aruba. Pa conta e historia poco cortico CAFT a haya bida despues cu Hulanda a pone Mike Eman bao curatela y na rudia na 2014. Mike Eman a DOBLA!! Nos tur ta corda con Mike Eman y AVP a entrega un presupuesto na 2014 cu un deficit, esta un buraco di mas di 400 miyon florin, es decir cu Aruba lo mester bolbe presta mas di 400 miyon pa cera e buraco y klop e presupuesto pa Mike su fiestamento sin fin. Mas tristo tabata e Parlamentarionan di AVP e tempo ey cu nan expertonan financiero manera Donkey Tromp, Clariska Velasquez, Desiree Croes, Donny Rasmijn, Norman Roos, Marlon Sneek pa nombra algun a vota unanimamente “VOOR” pa e desaster aki aprobando e presupuesto di Mike Eman cu un buraco di mas di 400 MIYON florin. Increibel pero berdad. P’esey nan a adopta e nomber y fama como “Stempel Parlament”. Parlamentarionan di AVP e tempo aya a haya instruccion for di Mike Eman promer cu reunion y ta drenta Parlamento holiendo inkt cla pa vota “VOOR” hopi biaha sin lesa nan documentonan. Asina cos tabata bay.
CAFT a faya barbaramente
Despues cu Parlamentarionan di AVP na 2014 a aproba e desaster di Mike, Hulanda mesora a manda opdracht pa Gobernador pa NO firma y ratifica e presupuesto aki y a manda un KB (Koninklijk Besluit) pa mara man di Mike Eman. Nos por corda con Mike a bay den welga di hamber. Gaña di wanta hamber den dia y bebe ensure na cantidad scondi anochi. Pues Mike kier bay shelo pero e no kier muri. Desde aki Hulanda a exigi Mike Eman pa firma un protocol 2 di Mei 2015 cual a duna bida pa bin cu un Ley di LAFT cual a mina nos autonomia y asina mediante e ley aki e baby CAFT a nace. Trabao di CAFT ta entre otro monitor si ta cumpli cu e normanan di acuerdo cu artikel 14 di LAFT, monitor alaves mehoracion di e maneho financiero. Wel conclusion ta cu CAFT a faya barbaramente pa cumpli cu su tareanan di acuerdo cu artikel 1 di LAFT. Por prueba cu bao supervision di CAFT hustamente tur cos a empeora.
CAFT mesun culpabel cu AVP
AVP hunto cu CAFT como su complice a tuma pueblo haci chambon. CAFT a permiti pa AVP changa e pueblo aki pa alcansa normanan di 2015 y 2016 cu un strategia incidental bendiendo edificionan di gobierno y usando 60.5 MIYON di SVB como exoneracion. Pues klop e cos bou di e strepi y esey tabata importante pa CAFT y no con a logra esaki riba un manera structural. Na 2017 CAFT a bolbe permiti AVP usa 73 MIYON di CITGO cual ya caba no a cumpli den 2016 y mucho menos den 2017. E momento ey CAFT a realisa cu AVP a tum’e haci penbieu y a hinca Aruba pata pata den cora cu un deficit di 130 MIYON den aña 2017. AVP no a cumpli cu Ley di LAFT den 2017. Norma pa 2017 tabata -25 MIYON cual finalmente a suma na un total di 155 MIYON di deficit. AVP den 2017 no por a cumpli cu e Ley di LAFT siendo bao supervision di CAFT. Pues CAFT ta mesun culpabel cu AVP den e desaster cu nan a ocasiona redoblando e debe nacional den 8 aña. Den 3 aña di CAFT e debe a sigui aumenta y a alcansa 93% di GDP.
Berguensa grandi pa Hulanda
Esaki ta un berguensa grandi pa Hulanda y CAFT kendenan lo bay den historia como complice pa a permiti e desaster financiero pa cu pais Aruba. Akinan si Hulanda tabata serio e mester a aplica artikel 9 di LAFT contra CAFT pero no a haci esaki. P’esey Parlamentario Endy Croes ta bisa cu CAFT deugt niet. Awor cu CAFT a laga e baca hoga nan kier cambia e actornan y kier ple de braafste jongen in de klas. Como Arubiano nos tin nos orguyo tambe y no lo baila manera CAFT ta pensa. Parlamentarionan di Coalicion lo no permiti CAFT, Staatssecretaris of Rijksmninisterraad hunga ningun wega cu lo perhudica nos pueblo. Nos no ta pidi ningun pero ningun placa pero ta exigi respet y ta pidi duna nos tempo pa regla e desaster cu CAFT y Hulanda a permiti AVP haci contra e noble pueblo aki. Endy Croes ta termina bisando si no tin respet di banda di CAFT e no lo ta interesa pa sinta cu nan y e Hulandesnan por wel di coy bapor frances y regresa Hulanda.