Recientemente Movimiento Electoral di Pueblo (MEP) a organisa un anochi di informacion na Districto di San Nicolas, e di 4 pa e aña aki. Pa e ocasion aki Directiva di San Nicolas a invita Ministernan Glenbert Croes, Xiomara Ruiz Maduro, Chris Romero y nos Minister President como oradornan.
E anochi aki Minister Glenbert Croes a hiba un disertacion hopi emotivo conviviendo cu e preocupacionnan cu nos pueblo tin den cuadro di e situacion financiero precario y e crisis social di nos pais.
Aruba ta pasando den momentonan sumamente dificil y inexplicablemente delicado. Como partido cu ta liderisa e Gobierno aki e tarea ta hasta inhusto, pa un Partido cu no tin ni arte ni parte den e problemanan financiero di nos Pais, mester ta esun cu awe ta tuma pasonan pa rescata nos Pais.
Pero nos por a core p’e responsabilidad y lag’e den man di AVP. Pero bo por ta sigur cu pa awo e tambe a hay’e ta tuma medida, cu intervencion y instruccion di Hulanda batiendo bancarota di Pais Aruba cu tanto nos Libertador a lucha p’e. Nos pueblo a lucha, sufri, yora, sangra pa nos a logra nos Status Aparte y bira Pais den Reino Hulandes. Betico a laga atras un Pais respeta den Reino. Nos como partido hamas lo por para un banda y permiti pa e abuso sigui tuma lugar. Nan a haci negoshi cu nos terenonan bende pa miyones. Nan a haci negoshi cu permisonan, un storia cu ainda nos no conoce su final. AVP su Minister President cu a hundi nos pais financieramente.
Facil tabata pa core pa responsabilidad y bisa AVP abo a caus’e, abo bay drech’e. Pero nos sa cu nan no ta capaz. Nos sa cu nan no ta dispuesto y ta prefera manda e pais aki bancarota prome cu tuma cualkier medida. Nos sa cu nan ta prefera Hulanda interveni prome cu salba nos Pais. AVP a mira Gobernacion como negoshi, Aruba como nan propiedad y placa di nos pais pa gasta na gusto di compinchi. Nos no por a tolera esaki mas.
Nos pueblo a pidi cambio y MEP a asumi e reto cu no ta facil y pa esaki nos ta pidi comprension y e confiansa di nos Pueblo. Awe nos ta dal un paso atras pa despues nos dal 20 paso mas dilanti pa por logra progreso y prosperidad husto pa un y tur cu ta biba riba e baranca aki.