Marisol Lopez-Tromp lo manda otro carta pa Minister di Enseñansa E tin diferente pregunta riba ehecusion di e ley di crèche na Aruba

Lider di Fraccion di POR, Marisol Lopez-Tromp a elabora riba e preguntanan cu el a haci na Minister di Enseñansa algun tempo atras, pero cu ten a e momentonan aki e no a haya un contesta por escrito riba nan., algun di nan a bin dilanti durante tratamento di presupuesto, pero lider di Fraccion di POR lo manda un otro carta cu preguntanan pa Minister Lampe riba entre otro e tema di ley di crèche, cual lo mester drenta na vigor den corto tempo.
Un di e preguntanan riba e tema aki ta cu si Minister di Enseñansa (bou di cual e ley di crèche ta resorta) a prepara su mes pa esaki y con leu e ta den preparacion di ehecusion. E pregunta aki a bin debi cu tat rata di centenaries di centronan di cuido di mucha, cada un cu nivel diferente, cu preparacion diferente y cu nan mester tin un permiso pa por habri y opera un crèche na Aruba.
E permiso aki ta mara na diferente aspecto di calidad, pa cu e cuido di muchanan, manera nan higiene, espacio cu tin, e nivel di e lidernan, aspectonan di seguridad, entre otronan.
E carta lo pidi Minister Lampe pa duna Parlamento un bista di con leu e ta pa cu e preparacion pa cu ehecusion di e ley pa e centronan di cuido di mucha aki na Aruba.
Otro pregunta na Minister Lampe ta si el a reuni cu e leidernan di e crechenan mirando e importancia di comunicacion, pa nan tur tan a altura di kico e ley ta encera.
Intencion ta pa haya e contestanan por escrito pa por comparti e informacion aki cu comunidad.