Den e ultimo carta di CFT, a tuma nota cu atrobe CFT ta trece dilanti cu nan tin preocupacion pa cu e gastonan di personal di Gobierno. Prome Minister Evelyn Wever-Croes ta indica cu esaki no algo nobo y desde principio di CFT esaki ta aparece den tur nan consehonan.
Desde cu a traha e Memorandum Financiero Economico (FEM), un capitulo a wordo dedica den dje cu ta forsa Gobierno traha riba e maneho di gastonan di personal cu actualmente ta bastante halto cu por haci cu e comunidad no por carga e peso aki mas. Den negosacionnan di Prome Minister na Hulanda esaki tawata un punto hopi importante. Ta cerca di yega na un acuerdo cu Hulanda.
Prome Minister a institui un comision cu ta trahando pa trece proposicionnan con lo bay maneha gastonan di personal na Aruba. Ya caba e comision aki ta reuni pa dos luna y ta trahando diligentemente y por bisa cu e producto ta kedando cla. Prome Minister ta bisa cu el a ripara cu tin confusion den nos comunidad pa cua motibo e ta trece e informacion di tur locual Gobierno di Aruba ta haciendo.
Ora ta papia di gastonan di personal, Prome Minister a splica na un manera hopi habierto y honesto bisando cu ora cu el a yega Hulanda e prome cos cu el a wordo bisa ta cu mester baha gasto di personal door di bin cu retiro masal obligatorio di personal. E contesta cu Prome Minister a duna ta cu Gobierno di Aruba no ta kere cu esaki ta e miho paso cu por wordo tuma. E mandatario ta convenci cu Gobierno por soluciona e problema aki sin recuri na e extremo aki.
Mesora Gobierno a cuminsa traha riba e plan pa bin cu sugerencianan con pa resolve e problema aki y baha gasto di personal sin mishi cu derecho di hende. Na esaki e Premier ta referi na e derecho di e ambtenaar y empleado publico cu ta funciona bon y ta haya loke nan tin derecho riba dje sin tin mester cana un caminda di cruz. Gobierno ta na haltura cu tin ambtenaarnan cu no ta funciona bon y Aruba y Gobierno no por sigui carga e peso aki.
Den e plan di Gobierno di Aruba, tin siete punto di sugerencia. Un punto ta e ‘vacature stop’, pues cu Gobierno no por tuma mas hende den servicio. Cierto departamento cu tin posicionnan vital cu mester wordo yena, hunto cu Departamento di Recurso Humano lo determina si lo ta un excepcion. Gobierno no por sigui expande e personal di e departamentonan. Tur departamento lo pasa den e proceso di reorganisacion na unda e tarea ta pa no crece den cantidad di ambtenaar. Lo bin cu metodonan creativo y mas digitalisacion pa tin menos necesidad di hende y maneha asina aki e gastonan di personal.
Un otro punto ta un areglo di ‘Vut” pa ambtenaarnan cu kier haci uzo di esaki. Ya caba, Prome Minister a indica, tin 17 persona cu a aplica den e ultimo lunanan pa un Vut. Un Vut lo ta mara na condicionnan, rekisitonan y proceduranan cu lo wordo publica. Esaki lo reduci e cantidad di ambtenaar den departamentonan. Esnan cu ta bay cu Vut no ta laga atras vacatura habri.
Overtolligheidspool ta un otro tema cu ta den e plan di Gobierno pa rebaha gasto di personal. Y e biaha aki, esaki lo mester wordo atendi cu man duro, segun e mandatario principal di nos pais ta bisa. Tin varios persona den overtolligheidspool cu a wordo persigui politicamente den pasado y a wordo manda cas mientras nan ta sigui cobra nan salario. Den maneho nobo aki di Gobierno di Aruba, lo manda e personanan aki bek na trabou pasobra pueblo no por keda paga hende cu ta na cas sin traha. Tarea y responsabilidad di Gobierno ta pa yuda e personanan aki haya trabou. Esnan cu realmente no kier traha, no por keda mas den overtolligheidspool y wordo paga.
Hunto cu esaki, Prome Minister Evelyn Wever-Croes a enfatisa loke Gobierno di Aruba NO ta bay haci. Alcontrario di rumornan cu a cuminsa core rond, Gobierno di Aruba lo no bay mishi cu salario di niun empleado publico. Pa e motibo aki Gobierno ta tuma e paso aki awo pa esaki no pasa den futuro. Tampoco lo mishi cu promocion di esnan cu ta funciona debidamente. Lo no mishi tampoco cu e beneficionan cu Gobierno ta ofrece entre otro Bashi Premi, Gelijkbedrag of Vakantieuitkering.
Prome Minister a indica cu e derecho di empleadonan publico lo keda mescos. Pero esnan cu no ta cumpli cu nan trabou debidamente, Gobierno lo atende cu nan na un otro forma pasobra nos comunidad no por keda carga pa esnan cu no kier cumpli.
Premier Wever-Croes a conclui bisando: “Mi ta spera cu esaki por trece algo di trankilidad. Ainda nos no tin un aprobacion y acuerdo cu Hulanda. Awe ta e dia cu mi tin cu manda e plan aki pa Hulanda, y lo keda warda kico nan lo bisa nos y lo informa pueblo. Retonan ta grandi. Retonan financiero ta enorme. Y Gobierno di Aruba ta haci tur posibel pa nos pasa den tur e turbulencia aki sin cu e ta causa nos mas dolor ainda. Pero ta awo nos mester tuma pasonan pa sanea e situacion sino e lo bira pio y lo afecta nos mas. Cu fe y confiansa, nos lo sali afo apesar di hopi desafio y mala suerte, y awor cu prijs di crudo ta subiendo internacionalmente. Ohala cu e por ta bahando manera tawata e caso di e Gobierno anterior cu apesar di esey nan no a probecha y duna pueblo alivio y baha prijs di gasolin. Pero pa nos e situacion ta otro. Gobierno ta traha duro pa vence tur obstaculo y lo sali for di e situacion aki”.