Aruba ta un pais hospitalaria cu semper a ricibi hendenan di diferente continente di mundo. Hendenan cu a incorpora den nos cultura y a contribui grandemente na economia di nos pais. E comunidad portugues na Aruba semper ta conoci como trahadornan duro y pa nan lucha constante. Riba dia di Portugal, Dia di Luis Vas de Camoes y Dia di comunidad Portugues rond mundo, Prome Minister Evelyn Wever-Croes a dirigi un bunita discurso gradiciendo e comunidad portugues pa e colaboracion grandi den e desaroyo di nos economia.
“Awe, 10 juni, nos ta hunto aki pa celebra dia di Portugal, dia di Luis Vas de Camoes, simbolo di patriotismo portugues, y dia di comunidadnan portugues. Aki na Aruba awe ta recorda tambe cu 53 aña pasa e comunidad portugues na Aruba a cuminsa celebra e dia aki na Aruba.
Un pueblo cu kier ta liber, mester di su simbolonan di libertad, y e bandera y himno di un pais, su celebracion nacional ta e prueba mas importante di un pais liber. Y ta un honor pa mi, den nomber di Gobierno di Aruba, di por celebra e fecha importante aki cu boso, mescos cu boso tambe ta celebra hunto cu nos nos dia di himno y bandera.
E comunidad Portugues na Aruba ta data desde añanan 60, y varios generacion cu a contribui na e comunidad multi cultural di Aruba. Esnan cu a bin di Portugal ta conoci como hende cu ta traha duro y lucha te fin. Personanan cu a busca un miho futuro pa nan famia, y cu dignidad y trabou duro, a logra esaki, y mester bisa, sin sacrifica balornan y origen.
Varios di boso a laga boso hogar y boso famia, pa bin establece na Aruba, y a haci di Aruba boso hogar. Sr. Betico Croes, ken ta wordo considera e libertador di Aruba, a bisa cu Arubiano no ta solamente esun cu a nace na Aruba. Si abo a nace na otro pais, y bo a haci Aruba bo hogar, abo tambe ta Arubiano.
Riba e dia nacional di Portugal mi kier felicita tur ciudadano Portugues, especialmente esnan residencia na Aruba, y gradici boso pa yuda nos desaroya nos economia. Den e transcurso di añanan hunto nos a experencia bon tempo y menos bon tempo na Aruba, y toch boso a keda, demostrando asina boso determinacion pa lucha pa e progreso di boso mes, y di Aruba. Danki pa kere den Aruba.
Nos pais ta enfrentando retonan enormemente grandi, retonan financiero, retonan social, retonan economico cu e retraso di reapertura di e refineria. Nos no mester tin miedo di e retonan aki, pasobra nos pais a enfrenta retonan similar den pasado.
Y mescos cu den pasado, e biaha aki tambe mi tin tur confiansa cu nos lo vence e retonan contal cu nos ta uni. Uni nos lo vence e retonan y desafionan. Uni nos lo vence tur obstaculo cu lo crusa den nos caminda, y uni nos lo logra e bienestar di nos pueblonan, cu tanto nos ta anhela.
Pabien! Y cu Dios bendiciona henter e comunidad Portugues y di Aruba. Muito Obrigado! Masha Danki!”