Partido MEP a tuma nota cu Parlamentario di AVP señor Richards Arends ta papia den tur media cu Gobierno di Aruba ta intruduci un “Transaction Tax” na Pais Aruba. Pregunta cu Partido MEP ta haci señor Arends ta, “Na unda abo tawata tempo cu bo mes un Partido tawata kier a introduci impuesto riba tur transaccionnan cu clientenan haci na banconan”?
Manera cu Minister Xiomara Ruiz-Maduro a enfatisa, Gobierno di Aruba no ta introduci un “Transaction Tax”. Esaki kiermeen cu no ta pa cada transaccion financiero cu usuarionan di banco haci na un instituto financiero, lo mester paga impuesto riba esakinan.
E ley di BBO (Belasting op Bedrijfs Omzetten) ta pa cobra riba e ganashi di e banco y no pa cobra riba e transaccionnan cu e cliente ta haci na banco. Despues cu a intruduci BBO na 2007, e gastonan administrativo di banco tawata exonera di paga BBO riba nan. Tur locual cu e banco ta genera na entrada pa e transaccionnan aki, e no tawata tin mester di a paga BBO riba nan.
Minister Ruiz-Maduro a splica tambe, cu e cambio di ley aki awo, e banco lo tin cu bay duna su cooperacion husto y lo paga un parti di esaki cu lo bay den caha di Gobierno. Un ehempel cu e Minister a duna ta cu di cada transaccion di cinco florin cu e banco cobra, 30 cent ta bay pa e caha di Gobierno. E banco e ora ta keda cu Awg. 4,70 p’e mes. Antes e banco tawata keda cu e cinco florin completo. Y awo e banco no tin exoneracion mas y lo mester duna Gobierno su parti.
Partido MEP ta lamenta cu den tempo di un crisis financiero y social, Parlamentario Richard Arends ta bin ta papia cu e cambio di ley di BBO lo causa cu e cliente lo mester paga riba tur transaccion bancario cu e ta haci mientras cu esaki no ta berdad. E Parlamentario aki ta bisa tambe cu el a alerta Gobierno actual pa no bin cu un ‘Transaction Tax’.
Pero loke cu a Parlamentario en cuestion mester sali pa splica pueblo ta, cu ta señor Angel Bermudez di su propio Gobierno di AVP, ta esun cu e tempo ey tawata kier a introduci ‘Transaction Tax’ riba tur transaccion bancario cu e cliente haci. E impuesto di AVP aki te hasta a haya e nomber di “Financial Transfer Levy”. Mas ainda, te hasta nan tawatin esaki den nan presupuesto.
E intencion di AVP pa introduci e impuesto aki riba tur transaccion bancario ta pa paga pa Proyectonan-PPP. Señor Bermudez e tempo ey a mira e nesecidad pa hisa entrada di Gobierno pa asina por paga e Proyectonan-PPP cu e Gobierno di AVP a realisa durante nan gobernacion 2013-2017. Proyectonan cu a contrui grandemente na nos debe nacional cu a ocasiona cu awe mester bin un crisisheffing riba nos pueblo.
Pregunta cu nos ta haci awo ta: unda señor Arends tawata e tempo ey? Dicon e no a sali pa pueblo e tempo ey? Dicon e no a sali alerta señor Bermudez y su Partido AVP e tempo ey? Acaso e tempo ey tur loke su Gobierno haci lo a contrui na e propio cartera di señor Richard Arends sin preocupa cu e usuario bancario? Richard Arends mes tawata kier a bin cu ‘Transaction Tax’ riba tur transaccion bancario cu e cliente haci poniendo un peso riba nos pueblo y a tum’e keto keto. Mescos señor Arends a sinta wak con su Gobierno di AVP a maltrata e pueblo aki y e mes a contribui na desgracia nos pais cu awe nos tin un debe asina grandi. Anto awe señor Arends kier bin papia?
