Durante e ultimo dianan aki, e 3 miembronan di fraccion di MEP di Comision di Enseñansa y Cultura: Sue-Ann Ras, Shailiny Tromp-Lee y Edgard Vrolijk ta atendiendo conferencia importante di Parlatino, enfocando riba e temanan di educacion, tecnologia y cultura. Loke a resalta den e prome dia caba, ta mara na e Agenda 2030 cu ta trata e metanan di desaroyo sostenibel, primordialmente e retonan di educacion exponencial.
Actualmente tambe ta tumando luga e Forum Global Virtual Educa Bahia 2018 cu e Parlamentarionan a bishita
Durante di e reunion a presenta un reseña cortico di e diferente areanan riba cual e comision di educacion, cultura, ciencia y tecnologia ta traha, cu sigur tabata algo di sumo importancia pa e 3 parlamentarionan, cu pa prome biaha ta asisti na e reunion di comision aki.
UNESCO
Un punto cu sigur nos lo bay traha riba dje ta esun di ciencia y educacion mediante di UNESCO. E parlamentarionan tabatin e oportunidad pa intercambia algun pensamento cu dr. Guillermo Anllo, cu ta esun responsabel pa e programa di politica cientifico pa UNESCO America Latino cu tambe a haci un presentacion pa e comision.
TECNOLOGIA
E punto di agenda aki a duna espacio pa diferente pais intercambia con nan ta mira of uza tecnologia den enseñansa na nan pais. E parlamentarionan a haya presentacion di prof. Fernando Rodal MacLean, cu ta presidente di Confederacion de Educadores Americano.
RETO
Ta importante pa sa ken ta uza tecnologia y ken ta administr’e, paso nan ta esun cu ta encarga cu educacion di nos mucha- y hobennan. Ta bon tambe pa para keto, cu no ta tur hende tin acceso na tecnologia. Y mas importante ainda, esunnan cu tin, na ki tipo y con nan tin acceso na tecnologia. Esaki sigur tambe ta un reto pa Aruba, specialmente e parti unda cu a pone hopi enfasis pa por bin cu programa di recapacitacion pa e maestronan pa nan por uza tecnologia como instrumento den enseñansa.
Finalmente por bisa, cu e 3 parlamentarionan ta hopi satisfecho cu e seccionnan sumamente interesante cu a keda presenta na Salvador, Brasil. Y mas importante ta, cu ta logra crea un red di intercambio di idea, pensamento y vision pa un educacion cu tin cu prepara nos mucha- y hobennan pa un era tecnologico y sostenibel.
