Recientemente Monumentenbureau a ricibi e ‘Recognition Award’ for di Aruba Certification Program, mi compromiso. Esaki despues cu henter e personal di Monumentenbureau a participa na e ‘Programa di exelencia di Aruba’ y termina esaki exitosamente. E ta di sumo importancia pa nos departamento di a completa e curso aki mirando cu nos ta keda den centro di ciudad, pega cu Museo y cerca di nos terminal di crusero. Diariamente nos ta ricibi bishita di turistanan y ta haci diferente pregunta. Nos personal ta prepara pa duna e mihor servicio y informacion corecto di nos producto Aruba y di es forma aki nos bishitantenan ta keda contento y satisfecho. Nos kier a gradici Minister di Finansas, Asunto Economico y Cultura Sra. mr. Xiomara Ruiz-Maduro y na ex Minister di Cultura sr. Otmar Oduber pa aproba participacion di Monumentenbureau na e curso conoci como “Aruba certification program, mi compromiso”. Alabes Monumentenbureau kier a gradici e docentenan di e curso, sr. Giovanni de Windt, Tyson Lopes, Melissa Robert y Susana Romero pa nan bon guia y dedicacion y pa comparti nan conocemento y informacion di Aruba. Durante un ceremonia special organisa dor di Aruba Certified Program y ATA a entrega un ‘Recognition Award’ na Monumentenbureau. Directora di Monumentenbureau, ing. Yvonne Webb-Kock a ricibi esaki pa su departamento. E curso ta uno na unda ta elabora riba e materia di turismo, historia, cultura, etc. Alabes y ta pone cu bo ta reflexiona pa ta mas excelente den servicio cu bo ta brinda. Monumentenbureau kier a curasha mas departamento y instancianan priva pa participa na e cursonan aki pa hunto nos por crea y desaroya un conocemento amplio, corecto y consistente di e producto Aruba.
