Ta parce cu te ainda e politiconan di AVP no ta realisa ta ki daño nan a haci nos pais durante
nan 8 aña di malgobernacion, esta di 2010 pa 2017. Un di e politiconan di AVP cu tambe a
yuda contribui na e daño casi insurmontabel na nos pais ta sr. Rene Herde, kende durante 8
aña a tolera, acepta y yuda su partido masacre e pais aki. Awe debi na su sentido di ‘mea
culpa’, e persona aki tin e curashi di declara cu e gobierno actual di MEP-POR-RED kier tapa
falta di maneho cu e palabra crisis. Ta un lastima cu te ainda sr. Herde no kier realisa ta den
ki desaster y crisis su partido AVP a hinca nos pais aden for di 2010 te cu 2017 y awe kier
pretende cu nan a laga un pais sano y financieramente manehabel atras. Hecho ta cu den tur
sector di nos comunidad nos por a mira un deterioro hamas bisto desde entrada di Status
Aparte. Ta p’esey ta na su lugar pa partido MEP recapitula y trece dilanti parti di e desaster
cu e partido di sr. Herde a hinca nos pais aden den apenas 8 aña di tempo.
Finansas publico
Desde 2010 pa 2017 Gabinete Eman a logra redobla nos debe nacional for di 2.2 biyon te na
4.2 biyon florin y esaki door di crea deficitnan insurmontabel di riba 300 pa 400 miyon florin
tur aña. Fuera di esey e pago na interes di e debenan aki a aumenta di 116 miyon te na 215
miyon florin pa aña. Y riba tur e debenan existente aki nan tabata tin e curashi di bin cu e
proyectonan PPP cu ta costa riba 2 biyon florin adicional sin cu nan tabatin e forma
financiero pa cubri tur e inversionnan aki, ya cu e idea cu nan kier a bin cu ne di introduci un
Financial Transfer Tax a fracasa na caminda. Esaki no ta un crisis financiero? Enberdad, un
crisis financiero cu hopi debe crea cu t’ey pa nos tur bay paga for di awo te cu por lo menos
2040!
Economia
Gabinete Mike Eman na inicio di nan gobernacion na 2009/2010 a ricibi den total un suma di
mas di 700 miyon florin na e.o. placa di Plant N.V., BBO di Valero, FDA, laga atras pa
Gabinete Oduber y cu cual suma nan tabatin tur oportunidad pa por a inverti grandemente
den nos economia. Alabes nan a haya durante e 8 añanan aki un suma total di mas di 725
miyon florin na e BBO local y cual BBO nan a demoniza den nan campaña di 2009 ya cu
supuestamente nan lo elimina esaki ‘from day one’ asina cu nan drenta gobierno.
Pero asina mes ricibiendo tur e sumanan biyonario aki y hunto cu e debe nacional cu nan a
redobla, nan no a logra crece nos economia y caminda nos por a mira crecementonan
economico negativo na 2010 (-3.4%), 2012 (-1.4%), 2015 (-0.5%) y na 2016 (-0.2%). Rene
Herde, esaki no ta ser considera como un crisis economico? Pues nada di gaba y un ‘brevet
van onvermogen’ pa un gobierno cu kier pretende di a haci hopi pa e pais aki, pero tabata
puro scuma y nada di chuculati.
Social
Si tin un gobierno cu desde entrada di Status Aparte a masacra e parti social na Aruba, esey ta
Gabinete Eman y AVP durante 8 aña di nan gobernacion. Nos por mira con nan a corta y/of
elimina den forma criminal subsidionan di organisacionnan social, manera di SABA (nos grandinan), SVGA (nos hendenan special), FMAA (nos hendenan cu adiccion), Casa Cuna,
FDEC.
Tambe bao di nan gobernacion miles di nos conciudadanonan debi na e pobreza y
miseria crea pa Gabinete Eman, nan a ser corta di nan necesidadnan basico di awa y coriente.
Culminacion di e crisis social cu AVP ta insinua cu no tin, tabata e morto di e 2 criaturanan
inocente aña pasa y cu tabata parti di e negligencia y mal maneho di Gabinete Eman.
Infrastructura
Asina mes cu Gabinete Eman a haya e mas di 700 miyon florin extra na placa di Plant N.V.,
BBO di Valero, FDA, mas di 700 miyon florin di BBO local den 8 aña y tambe e 2 biyon
florin extra cu nan a fia pa hinca den caha di gobierno, nan no a construi ningun cas social,
ningun warda di polis nobo, ningun compleho deportivo nobo y ta solamente un scol nobo
nan a construi den 8 aña. Por lo demas nan a laga mayoria di e edificionan publico atras den
estado di deterioro, sin ningun mantencion.
Esakinan ta solamente un parti chikito di e herencia bergonsoso cu partido AVP a laga atras
na final di 2017 y cu pa awe sr. Herde pretende cu no ta su gobierno di AVP a ocasiona tur e
crisis y maldadnan aki durante nan gobernacion. Echo ta cu no tin sordo mas cu no kier tende
y no tin ciego mas cu no kier mira. Aparentemente sr. Herde den su ignorancia no kier tende
ni mira e berdad cruel cu su partido a ocasiona durante 8 aña y lamentablemente cu e mes no
ta realisa cu e tabata forma parti di tur e maldadnan aki.
