Partido MEP na varios ocacion den pasado a informa tocante nombracionnan contra regla den Departamentonan di Gobierno cu e Gobierno anterior a haci pa su su hendenan. No solamente e Gobierno di AVP a nombra Robert Candelaria contra tur regla sino su esposa tambe a wordo nombra na un departamento cu e no ta prepara p’e.
Robert Candelaria a wordo tuma den servicio pa campaña pa AVP. El a biaha varios biaha prome cu esey caba pa bin campaña pa AVP, riba custia di pueblo. Despues nan a nombre hefe na departamento di Scheepvaart contra tur regla. Pa prome e no tin ningun conocemento di scheepvaart. Tampoco tabatin ‘open sollicitatie’. Asina mes Candelaria a coopera cu e actonan bochornoso aki pa horta placa di pueblo. Pasobra el a wordo nombra pero nunca a traha!
Partido MEP ta lamenta cu señor Candelaria a wordo paga placa di pueblo pa campaña pa AVP. Un hende cu pensamento asina ta hopi putri. Un hende cu ta coopera cu corupcion asina tambe ta corupto!
Mas ainda, Partido MEP ta considera un acto di sinberguensa cu esposa di señor Candelaria a wordo nombra na Departamento di Impuesto pero sa net nada di impuesto. Ta un Polis e ta. Awor pueblo mester paga pa e haya les di belasting. Esaki tin trahadornan di Departamento di Impuesto masha desgusta. Nan no tin Confiansa den dje y ta teme cu – mirando con baho Candelaria ta bayendo den su comportacion – cu e señora cuminsa saca informacion pa Candelaria uza contra oposicion. Pasobra Candelaria den corto tempo a rebaha su mes como Parlamentario y lo uza cualkier arma contra Gobierno. E tipo di hendenan asina ta haci daño na integridad di Departamentonan di Gobierno.
