Minister di Turismo, Salubridad y Deporte, Sr. Dangui Oduber a bishita Fundacion pa Esnan cu Problema di Oido (FEPO). Durante e bishita aki Minister a conoce tur e trahadornan y a haya un presentacion di con e fundacion ta opera. Tambe a trece preocupacionnan padilanti por medio di cifras a base di e ultimo añanan cu no a haya e debido atencion. Minister a ricibi tambe un splicacion amplio di con e testnan di oido ta wordo haci. Recientemente FEPO a hasi un inversion den un mashin cu ta facilita e trabounan y ta hopi mas eficiente pa asina e pashentnan por haya nan aparatonan di oido mas liher posibel. Aki ta trata di e mashin “Bonus Scan Smart Optics 3D “. Cu e technologia nobo aki ta simplemente hinca e “mold” di e pashent su orea den e mashin y esaki ta scan 100% conforme e midi original den un formaat digital y ta manda esaki merca pa traha e aparato di oido. Antes e pashent mester a warda un periodo di 4 siman pa ricibi su aparato. Cu e mashin nobo aki e pashent ta haya su aparato di oido den un periodo di 2 siman.
Preocupacionnan
Dirigentenan di FEPO tambe a trece nan preocupacionnan padilanti na e mandatario. Un di e preocupacionnan cu nan a trece padilanti ta locual AZV ta cubri y no ta cubri. Esaki nan ta bareranan cu por medio di e ley di AZV ta trece hopi incertidumbre den futuro pa e fundacion. Por ehempel, desde 2001 AZV ta cubri solamente Afl.830,- di e aparatonan di oido mientras cu añanan a pasa y esakinan a yega un costo di Afl.1440,-. Hopi ta esnan den nos comunidad cu no tin e manera pa cubri un gasto asina grandi.
Prevencion
FEPO a splica e mandatario cu conscientisacion ta di suma importancia. FEPO hunto cu Quota International of Aruba ta purba na conscientisa e comunidad mas hopi cu ta posibel pa cuido di bo oido na scolnan y tambe otro instancianan. Den 2017 FEPO a conoce 228 pashent nobo cual 36% di esakinan a resulta di tin mester di un aparato di oido. FEPO no solamente ta yuda na conscientisa pero tambe ta yuda na mehora e comunicacion di un persona cu oido malo.
FEPO tin tur e debido atencion di Minister Dangui Oduber y lo percura pa e preocupacionnan di FEPO wordo atendi por medio di adaptacion di e ley di AZV. Tambe e mandatario ta sostene e accionnan tuma riba tereno di prevencion. Tur inversion cu ta wordo haci awor den prevencion lo tin su resultado positivo a largo plaso.