Otmar Oduber ta haci un show di saca potret cu hendenan ora di duna tereno
ORANJESTAD, Aruba: Den e ultimo dianan a bin hopi critica dilanti y un di nan ta e poppen kas cu Otmar Oduber a organisa. El a yama hopi hende cu a haya un tereno prepara pa Benny Sevinger. Parlamentario di Fraccion di AVP, Arthur Dowers, a indica cu Benny Sevinger a laga diferente tereno midi cu por a duna na diferente grupo di comunidad, pero Otmar Oduber a arma un show pa crea e impresion cu e ta duna e terenonan aki a humiya hende.
Tin hende cu a acerca Parlamentario Dowers y a bisa na su persona cu nan a sinti nan mes literalmente humiya. Esaki ta hendenan cu no necesariamente ta votado di partido politico cu ta den gobierno of di partido AVP, pero ta hendenan cu ta bisa cu nan ta sinti cu nan tin e derecho di vota pa ken cu nan kier. Tambe nan ta sinti cu nan tin e derecho di pidi pa un pida tereno y nan ta sinti nan mes humiya cu mester bay cerca un minister y saca un potret cun’e y haci un show pa rasonnan politico.
Tambe tin persona cu a expresa di tin mas di 10 aña cu un peticion di permiso pidi, tin un cu a bisa di tin mas di 15 aña cu el a pidi permiso pa un tereno y a haya esaki. E persona aki a indica cu e ta haya cu esaki ta algo inacceptabel di un democracia, unda ta haci e show akinan. Aworaki ta papia di situacion dificil y awo bo ta haya bo tin cu bay huur un luga, gasta placa cu bo por uza p’e pueblo aki pa por haci un show barata politico.
Parlamentario Dowers ta spera cu e gobierno aki ta bay cuminsa recapacita, cuminsa bay traha na bienestar di pueblo y stop cu e forma baho cu nan ta hiba politica na e momentonan aki. Hasta votadonan di e mesun coalicion aki, e cos aki a cay den mal tera. Hende a acerca e Parlamentario y ta bon pa denuncia e cos aki. Ta parce cu e hendenan aki ta burachi di poder. E echo cu nan a logra cera cabes cu otro y ta sinta eynan, ta pone cu nan ta haci cosnan incomprendibel. Na final di dia Fraccion di AVP ta keda vigila nan y lo keda sigui denuncia e cosnan aki.