Koningstraat – Diabierna algo pasa di mey anochi central di polis a wordo informa, di un caso di hit and run.
Esaki lo a sosode altura di Costa Linda.
Mes ora a manda un patruya, paso tawata trata di un Autobus B-23. Esey no ta tur, chauffeur di e autobus tawata bou influencia, y tawata tin 10 persona abordo.
Esnan cu ela dal, cu tawata un Jeep v-car di e compania Royal Car Rental a sigui tras di e bus.
Dilanti cas di partido Avp, polis a logra stop e.
Mes ora a constata cu e bou influencia di un of mas substancia.
Agentenan na e sitio siguiendo protocol, a pidi pa trece un Alcohol Sensor pa test e chauffeur.
A pone supla, y e no ta pasa e test. Transportwagen a yega y nan a hinke aden y hibe warda di polis.
E homber aki nos a constata cu e no tawata apropia bisti pa trata cu pasahero.
E motibo tawata cu su carson tawata parcialmente baha y por a wak su parti intimo.
Hopi biaha e busnan ta yen y pasaheronan lo mester a sinta banda di e homber aki dilanti.
Na e sitio polis a constata cu e bus ta na su nomber y cu e ta di nacionalidad Venezolano, pero aparentemente e lo tin passport Hulandes
Cargonan cu e chauffeur lo haye cune ta, hit and run, core auto burachi, trece bida di 10 pasahero na peliger, y trece bida di otro hende ariba caminda na peliger.
Momento cu transportwagen a sali cune, un otro persona cu tawata bezig ta train pa e Ronde Van Aruba, a yega y bisa polis cu e Autobus aki a hera dal e.
Loke a pasa akinan ta algo hopi lamentabel, mirando bida di cuanto hende inocente cu a caba di traha cu ela pone na peliger.