“PRIJS DI CRUDO RIBA MERCADO INTERNACIONAL A SUBI!”, Esaki tin su efecto tambe pa Aruba
ORANJESTAD – Pa medio di e publicación aki Minister di Finansas, Asuntonan Economico y Cultura mr. Xiomara Ruiz-Maduro , ta anuncia cambio relaciona cu e prijsnan di venta pa combustible entrante diarazon 9 di mei 2018. Esaki ta debi cu prijs di crudo riba mercado internacional a subi y basa riba e prijsnan promedio di Platts US Marketscan (Gulf Coast) pa e periodo di 1 te cu 30 di april 2018 tin e siguiente cambionan.
*”Prijs di crudo riba mercado internacional ta aumenta”:
Según información ricibi di Departamento di Asuntonan Economico, Comercio y industria, e mandatario ta trece siguientemente un splicacion di e aumento di prijsnan di productonan petrolero pa 9 di mei proximo, na razon di postings di Platts US Marketscan e prijsnan di productonan petrolero a aumenta cu 7,0 cent pa litro pa gasoline y 7,3 cent pa litro pa diesel, esaki a raíz di e aumento di prijs di crudo riba mercado internacional. No tabata tin cambio den ningun di e otro componentenan pa calculacion di e prijsnan maximo pa e luna di mei.
*”Metodo di calculacion di prijs Aruba y Korsou”:
Adaptacion di calculacion di prijsnan maximo pa productonan petrolero ta sosode tur di dos diaranzon di luna. E calculacion di prijsnan maximo pa productonan petrolero ta sosode a base di informacion obteni di publicacion di postings di Platts US Marketscan, cual ta a base di prijsnan di productonan petrolero refina, anota internacionalmente. A base di Marketscan ta tuma un averahe di e posting di e dia ey, pa despues na final di luna saca e averahe mensual. Pa calculacion di prijsnan maximo pa productonan petrolero di un luna, ta haci uso di e averahe di postings di e luna anterior. Contrario cu Korsou e calculación di prijs máximo pa productonan petrolero pa e siguiente luna ta basa riba prijs di compra riba factura di e luna anterior, cu e consequencia cu e prijs local ta core dos luna atrasa compara cu e prijs nota riba mercado internacional. Den un siguiente articulo nos lo amplia mas riba e calculación di prijs máximo di productonan petrolero na Korsou.
*”Componentenan pa calcula prijs di productonan petrolero”:
Bolbiendo bek na Aruba, e componentenan pa calculacion di e prijsnan pa productonan petrolero ta e average monthly postings, gastonan di transporte, seguro, perdida pa medio di verdamping, accijns, margen di mayorista y detayista, BBO y BAZV. Tambe tin un componente di subsidio pa mantene e prijs di LPG (gas pa cushina) abao. Casi tur componente den e structura di prijs ta absoluto.
E desaroyo di prijs di productonan petrolero refina no ta igual na e desaroyo di prijsnan pa bari di azeta crudo. Prijs di productonan petrolero refina ta refleha 4 componente: 1. prijs di azeta crudo; 2. gastonan di refinacion y margen di ganashi; 3. gastonan di distribucion y benta y margen di ganashi; 4. Impuesto.
*”Pronosticonan ta premira cu prijs lo baha na Oktober”:
Según pronosticonan pa 2018 di EIA (U.S. Energy Information Administration) pa e temporada di zomer, chofernan na Merca lo mester paga un average di Afl. 2.42 mas pa litro pa prijs di gasolin, esaki ta e averahe prijs di benta mas halto pa e ultimo 4 añanan y esaki ta basa grandemente pa e cambionan di prijs di crudo. Siguiendo e pronosticonan na Oktober próximo ta premira cu prijs di productonanan petrolero lo bay conoce un reducción.