E industria turistico ta sigui demostra desaroyonan positivo pa nos destinacion, e biaha aki for di e sector di aviacion. Entrante 22 di december 2018 dos ruta nobo lo habri cu e aerolinea American Airlines. Esaki lo consisti di un vuelo semanal for di Dallas, Texas y un vuelo semanal for di Chicago, Illinois. E vuelo lo wordo realisa cu un avion tipo B737-800.
Pa Aruba, esaki ta nifica un potencial pa crecemento adicional den turista nan mericano a traves di diferente conexion via Merca.
Minister Dangui Oduber ta sumamento contento y orguyoso di mira e dos vuelo nan aki bira realidad. E ruta nan nobo ta habri mas posibilidadnan pa rutanan adicional for di mercado nan Mericano.
E vuelo nan aki lo nifica 16,640 asiento adicional pa un capacidad total di 916,520 procedente for Merca pa aña 2018 y un capacidad adicional di 6,400 asiento pa e temporada di winter 2018-2019.
E aerolinea American Airlines ta un socio importante pa nos turismo y ta operando na Aruba ya desde aña 1971. Aruba su relacion estrecho cu American Airlines ta sigui hisa calidad di nos turismo y sigui fortifica e ruta nan existente cu Aruba tin cu e aerolinea pa mas di 45 aña caba.
Minister Dangui Oduber ta felicita tur stakeholder cu e noticia positivo aki cu ta ofrese posiblidad nan mas amplio pa yega Aruba y ta sumamento contento cu e logro aki pa cu turismo di Aruba.
