E resultadonan di e prome aña di Afpakteam Integral di Aruba y di e cooperacion entre e partnernan den e cadena hudicial, a wordo presenta awe na minister di Husticia, Seguridad y Integracion y na minister di Finanzas, Asuntonan Economico y Cultura durante un reunion na Ministerio Publico.
Tanto e Procurador-General di Aruba, mr A. van Dam, como e Fiscal di Husticia di Afpakteam a hiba palabra y a wak back riba e aña cu a pasa, pero tambe a wak dilanti pa (entre otro) formanan nobo pa traha hunto intensivamente pa logra resultadonan mas mihor ainda.
E Afpakteam lo sigui dedica na crea condicionnan pa yega na cera lazonan di cooperacion cu otronan.
Banda di esey ta trahando tambe na amplia e capacidad di Afpakteam.
Minister Bikker a aproba caba e expansion di Afpakteam y e sessionnan di brainstorm durante e reunion di awe a trata grandemente tocante e realizacion y e completacion di esaki.
Procurador-General di Aruba a papia den su speech tocante e significacion di Afpakteam pa cu e sosten cu Fondo di Criminalidad ta duna na rechtshandhaving.
Afpakteam a tuma casi 6.6 miyon Florin den beslag den e aña cu a pasa. E placa aki ta destina pa e Fondo di Criminalidad y lo wordo usa pa rechtshandhaving na Aruba.
E cen aki lo por wordo destina na inversionnan den (por ehempel) un radar, autonan di polis of aparatura di scan pa Aduana, pero tambe na inversionnan den trainingnan y specializacionnan. E gastonan di combatimento di criminalidad ta aumentando tur parti na mundo, tambe na Aruba. Esey ta pasobra criminalnan ta bira dia pa dia mas spierto y ta haci mihor uso di inovacionnan tecnologico. Husticia no por keda atras.
Actualmente ta trahando riba un areglo di good governance pa e Fondo di Criminalidad, den cual ta bay regla bon con capital criminal cu wordo tuma den beslag y kita, ta wordo destina. Minister di Husticia ta pone gran enfasis riba e areglo aki.
Afpakteam a cuminza traha riba prome di maart 2017 y ta un colaboracion di Ministerio Publico, Cuerpo Policial di Aruba, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba, Meldpunt (Meldpunt Ongebruikelijke Transacties), y RST (Recherche Samenwerkingsteam). Afpakteam ta traha riba bringa criminalidad financiero economico. Si bo persona sa di señalnan di labamento di placa, acerca Afpakteam na mail ([email protected]) of tiplijn (telefon 11141)
Crimen no ta paga!
