Alan Howell Un parlamentario mester tin su pais na prome lugar y no su partido

Parlamentario Alan Howell durante su disertacion diamars a pone enfasis riba e parti di futuro.
El a inicia bisando cu e no kier concentra riba pasado, un pasado cu ta regarda e gobierno anterior, mirando cu e no ta mucho bunita y ta hole hopi stinki, pero si a manda un mensahe bon cla den direccion di esnan cu ta retando fraccion di POR. “Ora bo changa un porco bo tin cu changue bon y esaki ta exactamente loke fraccion di POR y coalicion lo bay haci contra esnan cu a malgasta placa di pueblo”.
Despues di esaki el a bisa cu contrario na pasado, awo ta deal cu hende drechi, y cu e tin pleno
confiansa den Gabinete Wever-Croes cu nan sa di sanea e finansas publico, cu nan lo haci miho pa trece siguridad bek, cu nan lo haci miho pa tur pesona cu tin cualkier kebranto di salud, cu lo haci lo miho pa stimula economia di Pais Aruba, en especial San Nicolas, cu lo tene nos hendenan central y lo saca nos for di abismo cu nos ta aden cu problemanan social, cu lo haci lo miho pa deporte, pasobra un deportista extra ta un delincuente menos, cu nan lo haci miho pa mehora nos infrastructura y traha cas un biaha mas pa esnan cu mas tin mester.
Finalisando Alan Howell a bisa “Mi ta desea Gabinete Wever-Croes tur clase di exito, cu Dios bendicionanan y yenan di sabiduria, pa mantenenan recto y firme como gobernante pa haci lo miho pa nos pais. Tambe pa e 21 parlamentarionan corda cu ora nan ta sinta den e sala di Parlamento nan ta representa Pais Aruba y no un partido”.