ORANJESTAD – “Con por ta posibel, cu nos ta kere cu nos sistema di enseñansa ta bon y nos ta kere ciegamente, cu nos muchanan ta hayando un oportunidad husto pa siña?”, esey ta un pregunta cu parlamentario pa partido MEP Sue-Ann Ras a puntra den su disertacion durante tratamento di presupuesto 2018 di pais Aruba. “Shonnan, UNESCO a bati na nos porta, cuestionando nos sistema di enseñansa basico, unda cu Aruba ta posiciona nr 1 den region Caribe, pa ripiti klas den ful enseñansa basico y esaki ta den e buki di vision y maneho di e minister di enseñansa anterior”, e parlamentario a sigui bisa.
RIPITI KLAS
Ras a comparti e informacion cu entre 2009 y 2013 un averahe di 10% di studiante na Aruba a ripiti un klas y esaki ta di klas 1 te klas 5. Den 2013 so, 18% di e alumnonan di klas 1 a keda sinta, haciendo Aruba un di e paisnan cu e porcentahe di mas halto cu ripiticion di klas di scol basico den region. E porcentahe mas halto di ripiti klas ta core den klas 1 pa klas 3, netamente e fundeshi, unda un mucha mester siña lesa, skirbi, rik etc. El a pone esaki den cifra, unda cu e cantidad di alumnonan cu a ripiti un klas den aña escolar 2011–2012 tabata 307 alumno, cual ta ekivalente na por lo menos 10 extra klas 1, basa riba e maximo di 30 studiante. “Kiermen un gasto adicional significativo debi na ineficiencia. Teniendo tur e datonan aki na cuenta, ainda ta tribi di bin bisa mi, cu nos enseñansa ta di calidad? Cuanto mucha mas mester sigui ta victima di nos mentalidad colonisa?”, Ras a sigui bisa.
DESCUBRIMENTO
E descubrimentonan aki ta brinda nos algun splicacion pa e progreso relativamente abou, segun Ras, compara cu Hulanda di e alumnonan di klas 6, cu ta bay HAVO/VWO, paso e chensnan pa bay e tipo di scolnan ey, ta baha significantemente ora nan ripiti un klas. “Awo a dicidi pa bolbe baha e normanan den klas 6 y netamente esey no lo refleha calidad di enseñansa y mucho menos miho prestacion di nos alumnonan. Paso no por ta posibel cu pa bay MAVO un alumno den klas 6, por tin 12 punto den idioma y matematica y unda como docente bo ta midi parcialmente e actitud y disposicion di un mucha pa cu siñamento, no ta conta? Den e preguntanan minister a bisa cu esaki ta den revision, anto e ora, dicon e scolnan ta bay aplica esaki den veld? Esaki no ta algo cu ami a inventa, sino ta preocupacion di e propio docentenan en cuestion y mi tin cu vocifera esaki”, Ras a sigui bisa.
PASADO
Den pasado e minister anterior tambe a bin cu un solucion, na momento cu UNESCO a bati na porta. Mas bien el a ordena pa djis schuif e problema pa klas 2; pues niun mucha mag di keda sinta mas den klas 1. Un solucion abrupto, sin vision y responsabilidad pa loke ta trata maneho y structura di brinda un miho calidad di enseñansa.
E total pa aña, bayendo riba e averahe di e añanan 2009-2013, a costa pais Aruba den klas 1 so Awg. 578, 942 na alumno, maestro y local extra. “Y ora cu agrega e cantidad di klas 1 te 6, ta yega na un suma di Awg. 1,468,592 pa aña, fuente di Departamento di Enseñansa. Anto conta esey den 20 aña, simpelmente increibel! Y niun hende no kier haci nada na loke ta trata e sistema di enseñansa? Shonnan, si nos kier nos pais progresa, mester inverti den enseñansa, enseñansa y enseñansa”, Ras a sigui bisa.