Paradera: Diahuebs pa mas o menos 12’or y 45 di marduga, presencia di polis ta wordo rekeri riba e caminda di Paradera, entre Anytime Bar & Restaurant cu e rotonde di Paradera, pa un persona cu lo tabata bula dilanti auto y tabata tira e autonan cu piedra.
Mesora a manda un patruya na e sitio y dilanti di Best Deal pariba di e rotonde di Paradera nan ta topa cu e homber. E homber tabata di remate, aparentemente e lo ta bou influencia di un of otro droga cu a pone su cabes flip y a cuminsa bula dilanti auto y tira e autonan cu pasa cu piedra, cual sigur por trece trafico den peliger.
Mesora nan a bay na detene, pero e homber tabata resistiendo ferosmente, te hasta cu esnan cu tabata pasando eybanda a bay trata na yuda polis, pa tene abou mientras e transportwagen di polis tabata na caminda.
Despues di un rato refuerso y e dogcatcher a yega, e homber mesora a wordo hinka den dogcatcher y transporta pa Warda di Polis.
