Parlamentario Endy Croes a splica cu e lo kier bringa pa trece un alivio pa e rebendedornan di Lotto pa Deporte. Actualmente tin masha hopi reclamo di parti di e rebendedornan pa cu e trato cu nan ta ricibiendo for di Lotto. E rebendedornan kendenan ta e cara oficial di Lotto, alaves tin e prome contacto directo cu e cliente y hasta ta esnan cu mester wanta talves zundra pa Lotto, ta den un posicion discriminatorio. E rebendedornan aki ta cobrando 10% di comision riba e benta total di cada producto. Supone cu nan bende Afl.1000 riba un dia, ta apenas Afl. 100 florin ta pa nan mientras Afl. 900 florin mester bay pa Lotto.
Comision di 4% pa rebendedor
Desde algun tempo caba Lotto a cuminsa exigi e rebendedornan pa nan mes paga 3.5% di BBO y BAZV for di nan 10% di comision. Es decir di nan 10% cu nan ta genera nan mester paga 3.5% y ta draai cu apenas 6.5% di comision. Den e ehercicio pa introduci e crisis heffing esaki lo manda e rebendedornan cu 2.5% mas atras y lo termina trahando pa 4%. Segun Parlamentario Endy Croes esaki lo trece e rebendedornan den dificultad serio pa cu nan negoshi. Ta debatiendo internamente pa busca un solucion y asina crea un maneho manera tur otro pais unda lo exonera e rebendedor di e tipo di belastingnan aki y transferi un belasting pa e ganador.
Belasting pa ganador
Segun Parlamentario Croes por introduci segun un calculacion preliminar entre 10 pa 12% riba tur premio y esaki lo trece mas o menos mesun placa den caha di gobierno. Croes a duna un ehempel simpel alrespecto un benta anual di Lotto. Benta bruto 49.9 Miyon. 6% (BBO, BAZV, Crisis PPP Heffing) di esaki lo produci pa caha di gobierno Afl. 2.9 Miyon pa aña. Si converti esaki pa cobra e ganador, e lo bira como lo siguiente: Benta bruto 49.9 Miyon kita averahe 50% cu ta bay na premio ta keda 24.9 Miyon. Di aki bo lo por kita entre 500 y 800 mil di uncollected prices annual. Supone cu di 24.4 Miyon cu ta placa cu Lotto a paga na premio, e ganadornan mester paga 12% na belasting y esaki lo suma 2.9 Miyon anual. Parlamentario Endy Croes a splica di lo traha duro pa logra trece un cambio den e direccion aki y asina libera e rebendedornan di un dolor grandi cu nan ta pasando aden.
