Asociadonan di Marriott Aruba lo ricibi reconocemento na Orlando
ORANJESTAD, Aruba: Recientemente Marriott Surf Club y Marriott Ocean Club a saca nan asociado cu a logra e meta di 100 comentario positivo. E aña aki Philip Martinus di “Recreation” na beach a logra e meta aki unda el a yega 200 comentario positivo. Aña pasa Linda Henriquez, di “Recreation Center – Towel attendance – Palapa hut” tambe a logra yega 200 comentario positivo y e aña aki ambos asociado lo biaha pa Orlando na Merca, pa ricibi nan reconocemento. Durante e bishita nan lo bishita e oficina principal di Marriott Vacation Club na Orlando. E biaha aki e asociadonan por hiba un invitado y lo pasa 4 dia na Orlando, cu ta inclui un tour pa bishita e oficina principal y cera conoci cu e CFO Stephen Weisz, cu lo entrega e trofeo oficial di e “200 way to go”.
E hotel ta orguyoso di e asociadonan cu a yega 200 comentario positivo, asina e Gerente General di Marriott Aruba Surf Club, Joop Bangma, a expresa. El a enfatisa cu Linda Henriquez ta un dama energetico y e ta interactua hopi cu e huespednan. E forma con Linda Henriquez ta haci esaki ta pone cu huespednan ta menciona su nomber den e encuesta. Linda Henriquez tabata nomina aña pasa den e ‘200 ways to go’ y e no por a bay pa motibonan personal, pero e aña aki e ta bay. Joop Bangma ta orguyoso di tin Linda Henriquez den nan team.
E gerente a expresa cu Philip Martinus ta traha banda di lama y den su trabou e ta move hopi lihe. E ta yuda tur hende y e tin un personalidad tremendo. E General Manager ta orguyoso cu Philip Martinus a yega e “200 way to go”. Mas leu el a bisa cu “E merece pa bay Orlando y ricibi e reconocimento cu e ta haya tur dia for di nos huespednan”.
E asociadonan Linda Henriquez y Philip Martinus ta dos persona cu ta haci impacto riba vakantie di e huespednan y riba nan bida, asina Gerente General di Marriott Ocean Club, Erwin Noguera a expresa. Nan ta crea memoria p’e huespednan cu tin un time share of cu ta di bishita. Door di nan e huespednan ta regresa y ta menciona nan nomber riba e encuesta, pa nan bon trabou. E programa di “Way to go” ta reconoce excelencia, momentonan inolvidabel y experencia memorabel di vakantie cual huespednan lo corda pa semper. E huespednan ta mira detayenan di e asociadonan cu ta resalta y di cual Linda Henriquez y Philip Martinus a logra esaki.
Pa Linda Henriquez por a yega e 200 comentarionan positivo, e prome paso tabata smile cu e huespednan, ta hopi amabel y yuda huespednan. Pa su persona ta importante pa papia cu e huespednan y haya sa si ta nan prome biaha na Aruba of ta di honeymoon. Huespednan cu ta bin constantemente, ta yama nan na nan fam y e huespednan gusta esey. Ta importante pa corda kico e huespednan ta bisa nan, manera si un hende ta haci aña y e asociadonan ta bini hunto y canta p’e.
Philip Martinus su trabou diariamente ta pa prepara e stoelnan p’e huespednan, pero tambe ta check cu e huespednan si nan mester cualkier ayudo y ta contento. Un di e momentonan ameno cu Philip Martinus tin ta ora huespednan ta regresa y nan ta reconoce su persona y ta corda tur cos bon cu el a haci pa nan. Esaki ta prome biaha cu Philip Martinus ta bay biaha y e ta contento pa esaki.
Aruba Marriott Resort & Stellaris Casino a habri na aña 1995 cu 411 camber. Na aña 1999 a habri Ocean Club cu 311 camber y na aña 2004 a habri Surfclub cu 900 camber. Na tur, e famia di Marriott Aruba ta consisti di mas o menos 1200 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.
