Manera a bira conoci durante fin di siman, finalmente Reino Hulandes y Venezuela a logra yega na un acuerdo y habri fonteranan bek pa loke ta trafico aereo y di barconan di carga pa Aruba, Boneiro y Corsou.
A firma un acuerdo riba coperacion bilateral pa atende asuntonan fronteriso, incluyendo contrabanda y migracion, y pa inmediatamente restaura e trafico aereo y maritimo entre
Venezuela y e islanan di Caribe Hulandes.
Islanan di Caribe Hulandes y Venezuela semper a gosa di un amplio coperacion mutuo den diferente aspecto, y como tal nos a traha den conhunto pa por a yega na un solucion satisfactorio pa tur partido den e impase cu nos tabata aden.
E acuerdo cu a yega na dje tin su condicionan
Mester remarca cu pa loke ta trafico maritimo comercial, barconan di carga so por drenta y cu restrinccion riba e productonan cu nan importa.
Cu efecto inmediato, Minister Chris Romero a prohibi entrada di botonan chikito, mihor conoci como ‘lancha’, como tambe di e botonan conoci como ‘peñera”.
Trafico aereo si a bolbe bek na normalidad y segun por a compronde, tur vuelo comercial a cuminsa reanuda nan itinerario paulatinamente.
Pero mas cu claro lo bay tin algun restriccion pa loke ta e trafico di pasahero for di y pa Venezuela.
“Nos ta contento cu a logra convence nos pais bisiña di e importancia di mantene un bon relacion entre Venezuela y e islanan di Caribe Hulandes. E relacion aki ta algo beneficioso tanto pa nos pero pa Venezuela tambe”, tabata palabranan di Minister Romero na ocasion di e logro aki.
Venezuela ta un bisiña importante pa Reino Hulandes, y especialmente pa islanan di Caribe Hulandes.
Tin lasonan historico, economico y cultural cu ta uni Reino Hulandes y Venezuela, y esakinan ta constitui e base di e relacion bilateral cu a existi entre nos, pa siglonan caba.
