Glenbert Croes su vision y meta principal ta di encamina e proceso di rescate di nos Pais di e crisis social cu ta afectando e existencia di hopi famia aki na Aruba.
E ta tristo pa constata cu unda cu bo lesa den reportahenan p.e. di Hulanda, locual cu mas nan ta enfatisa ta e problema social na Aruba, ademas di e estado financiero sumamente delicado di nos Pais. “Y esaki ta haci ami como e Minister encarga cu Asunto Social hopi dolor”, Minister Glenbert Croes a expresa. “Na mes momento e ta molestia mi con politiconan por a permiti esaki. Con nan por a para mira nos pais hundi dje forma aki. Cu ora nan a tende grito di auxilio nan no kier a scucha. Ta mira pobresa den pueblo pero ta prefera bira cara. Nan sa cu tin mucha ta bay scol sin come ta pasa hamber, pero ta prefera sigui haci negoshi cu permiso y tereno. E cosnan aki ta indigna mi pasobra nan a sinta hunga grandi riba stoel di Minister lubidando riba esun cu a pone nan eynan”, tabata expresion di Glenbert Croes.
Pero nos kier pa nos pueblo sa cu tur stakeholder envolvi a cera cabes hunto y pone man na obra. Diabierna ultimo e di dos reunion di ehecucion di e Crisis Plan Social a tuma lugar. “Nos no ta papia so. Nos ta actua tambe”.
“Locual cu socialmente nos haci awe, ta nos futuro generacion nos ta proteha. E paso y decisionnan cu nos tuma awe ta pa saca Aruba for di e abismo y pone para bek cu orguyo riba su pia pa nos yiunan por goza di dje. Abo y ami probablemente lo no mira su fruto pero si nos lo tin e consenshi limpi y trankil cu nos a actua na e momento cu mas Aruba y nos pueblo tabatin mester di nos”, un Glenbert Croes consciente dje reto a expresa.
Pero unda tin boluntad hunto nos lo logra e miho pa nos Pais.
