Andronico “Ito” Rasmijn (20 aña) y Miguel Guzman (25 aña)
ORANJESTAD, Aruba: MetaCorp a celebra aniversario di añanan di servicio di 2 empleado di ATCO Aruba N.V. Andronico “Ito” Rasmijn a cumpli 20 aña di servicio, mientras a celebra 25 aña di servicio di Miguel Guzman. Famia y coleganan a bini hunto cu Ito Rasmijn y Miguel Guzman na Balashi Beer Garden, pa asina celebra e añanan di servicio di e empleadonan unda cu a pasa un atardi ameno.
Ramoncito Croes, Operation Manager na ATCO Aruba N.V., a expresa cu Ito Rasmijn tin 20 aña ta trahando cu ATCO Aruba N.V. y e ta un chauffeur di truck, pero tambe e ta un empleado ehemplar. E ta un persona cu ta na ora na trabou y e ta cumpli cu loke ta su trabou di e dia ey. “Tur dia e tin un reto cu su mes. Su reto ta pa haci su mes miho di loke el a haci ayera”, asina Ramoncito Croes a expresa di Ito Rasmijn.
Den trabou e ta un persona cu ta cuida su ekipo, pasobra asina cu algo pasa cu su ekipo di biaha e ta tuma contacto cu su superior y di biaha ta manda e truck garashi, pasobra Ito Rasmijn kier su truck den bon condicion p’e por sigui cumpli cu su trabou. E ta un persona cu ta pensa riba e progreso di e trabou y tin e mentalidad di baha gasto.
ATCO Aruba N.V. a celebra 25 aña di servicio di Miguel Guzman, kende ta un persona cu ta aporta na e historia di ATCO Aruba. Ramoncito Croes a expresa cu Miguel Guzman a bin Aruba y a haci diferente trabou, pero desde momento cu ATCO Aruba a tuma over tur ekipo uza pa traha un hotel, nan tabatin mester di un operador. Nan a bin haya sa cu Miguel Guzman tabata operador di heavy equipment y el a siña di su mes trahando cu e ekiponan. Asina 25 aña pasa el a cuminsa traha na ATCO Aruba N.V. y durante e añanan ey el a sa di pusha su mes te unda e ta awendia. Ramoncito a elabora cu semper por conta cu Miguel pa cualkier trabou sea ta limpiesa di tereno chikito of di tereno grandi, pero tambe pa transporte di carga chikito, pa carga hopi grandi y hopi pisa. Miguel su conocemento di inventario di ekiponan y materialnan cu nos tin ta hopi bon y sa con y ki ora mester di nan pa cumpli cu trabounan special na manera efectivo. ATCO Aruba N.V. a gradici Ito Rasmijn y Miguel Guzman pa nan sosten cu e compania y pa nan bon trabou.
Miguel Guzman a gradici tur su coleganan di trabou p’e oportunidad cu el a ricibi y asina yega unda e ta awendia. E ta contento di su trabou y di tur cu a yud’e na yega asina leu, e ta haya cu nan ta un union grandi den e trabou pasobra hunto nan ta percura pa haci loke mester wordo haci.
Tur presente a disfruta di e dushi cuminda cu nan a ricibi y di por a pasa un atardi hunto despues di trabou.
