Durante ultimo reunion publico di Parlamento, parlamentario Alan Howell a puntra Minister Dangui Oduber estilo di ” iets op de man afvragen” cu si e ta dispuesto y si e ta bay duna nos muchanan di organisacion di White Sharks Baseball Team un man cu renobacion di e veld na unda nan ta train.
Ta asina cu White Sharks ta train ariba e veld di Xander Bogaerts mihor conoci como Lago Heights Ballpark. E ball park encuestion su luznan ta casi bin abou formando peliger pa e muchanan. Tambe e ball park mester di un bon mantencion y e muchanan tin mester algun material pa train nan deporte como debe ser.
Segun Alan Howell, a tuma nota si cu e muchanan y mayornan mes a cuminsa bende rifa, pero e ta di opinion cu bendemento di rifa mester cuminsa pasa pa pasado pa e tipo di cosnan aki.
Alan Howell, mayornan di e muchanan y hopi otro hende a keda contento ora a scucha di Minister Oduber su propio boca cu e muchanan por depende riba dje y Gobierno. Asina nos ta mira un parlamentario cu ta bringando pa su pueblo, un politica moderno y un Minister di Deporte capas y cla pa haci un diferencia.
