Despues cu poco poco e pueblo Arubano a bin ta comprende henter e maneho financiero desastroso cu a ser hiba pa partido AVP durante e ultimo 8 añanan, den e ultimo dianan e politiconan desespera aki a bin cu sin fin di comunicado p’asina trata di sigui manipula mente di pueblo. Asina nos por a lesa y scucha un gran cantidad di disparate y mentira di politiconan manera Richard Arends, Marlon Sneek, Arthur Dowers y e autor principal di e desaster financiero, Mike Eman, kendenan tur sin excepcion a canta y yora e mesun cantica e siman aki, esta cu e gobierno actual lo aumenta e BAVP cu 2.5% y tambe cu e deficitnan cu Gabinete Eman lo a laga atras ta segun normanan stipula pa Caft etc.
Desaroyo di nos GDP, 2001-2016
Gran parti di e informacionnan aki ya a ser contraaresta pa partido MEP. Sinembargo ta remarcabel cu den tur e mentira y manipulacionnan aki di AVP, nunca nan a papia of skirbi algo riba e desaroyo di nos GDP (Producto Interno Bruto), esta loke nos comunidad a produci durante e diferente añanan. Logico, ya cu esaki no ta nada positivo pa cu e maneho cu nan a hiba durante e ultimo 8 añanan. Ta p’esey partido MEP ta haya cu ta na su lugar pa trece e tabel adhunto, caminda nos por mira e desaroyo di nos GDP durante e gobernacion di MEP (2002-2009) y esun di AVP (2010-2016). Asina nos por mira con na 2001 ora cu Gabinete Oduber a asumi mandato, nos GDP tabata na apenas 3437 miyon florin. Sinembargo, danki na un maneho dinamico cu un sin fin di inversion nos GDP a crece y yega te na 4473 miyon florin na final di 2009. Pues den 8 aña di Gabinete Oduber, nos a conoce un crecemento di GDP cu 1036 miyon florin! Contrario na esaki, Gabinete Eman a asumi gobernacion na final di 2009 y a haya nos GDP na 4473 miyon florin y segun e ultimo cifra oficial di GDP di 2016, esaki a yega te na solamente 4774 miyon florin. Pues un crecemento di GDP cu solamente 301 miyon florin! No ta un berguensa pa partido AVP? For di e tabel nos por destila tambe cu Gabinete Oduber a crea e record di GDP desde Status Aparte, esta na 2008 nos GDP a yega te cu 4914 miyon florin y cual durante gobernacion di AVP nunca esaki por a wordo iguala, corda surpasa. Cu na 2009 tabatin un caida substancial den nos GDP, esey ta atribui na e crisis financiero mundial cu tambe a afecta Aruba severamente!
Cinco biyon florin extra
Pero locual ta mas lamentabel ainda ta cu durante e ultimo goberncion di AVP di 2009-2017, nan a haya na cuminsamento di nan gobernacion un suma di 970 miyon florin cu Gobierno di MEP a laga atras y cual suma nan a derocha na nan antoho. Esaki no tabata basta pa AVP y nan a dicidi di sigui aumenta nos debe nacional cu 2.1 Biyon florin den 8 aña. Y pa completa nan obra macabro nan a crea un extra debe mediante e proyectonan PPP cu ta suma na un total di 2 Biyon florin cu tin cu ser paga den e proximo 25 pa 29 aña. Pues cu tur e sumanan biyonario extra aki di total 5 Biyon florin, nan no a logra crece nos economia den forma drastico, al contrario na 2005 y 2006 nos pais a conoce caidanan substancial di nos economia. Pregunta di MEP na AVP ta: “Dicon cu e 5 biyon florin extra aki cu boso a haya, boso no por a logra crece nos economia den forma substancial durante 2010-2017?”
Esaki siguramente ta un berguensa pa un partido cu ta pretende di tin e profesionalnan pa guia e pais aki den forma positivo, pero e resultado final tur hende mes por mira esaki: Caida den nos economia y creacion di un desaster financiero hamas bisto den nos historia!