Nos muchanan a demostra un conocemento amplio riba derechonan di mucha
Dialuna mainta lider di fraccion di POR, Marisol Lopez-Tromp representando e fraccion blauw den Parlamento tabata presente na un evento hopi special pa nos muchanan.
Na Palm Beach Plaza na Caribbean Cinemas a tuma lugar e premiere di e prome Festival di Cine na Aruba riba Derechonan di Mucha di UNICEF.
Marisol Lopez-Tromp a indica cu ta un honor di por tabata presente na e ocasion aki unda peliculanan di studiantenan di Colegio Santa Famia, Colegio Santa Filomena, Mon Paisir Basisschool, Princes Amalia Basisschool y Pius X School a wordo presenta.
A reina un ambiente hopi positivo unda un calidad halto di produccion y conocemento amplio riba e temanan presente a sobresali. Remarcabel ta cu ta e mesun studiantenan a elegi e topiconan for di tratado di derechonan di mucha. E topiconan di e peliculanan ta adopcion, educacion, opinion y privacidad, temanan cu ta demostra e interes di esnan cu lo tan a cabes di nos pais dentro di algun aña y cu ta duna confiansa cu nos lo ta hopi bon representa riba tur tereno, segun Lopez-Tromp a duna di conoce.
Na final el a manda palabranan di pabien den nomber di fraccion di POR na e muchanan di Colegio Santa Filomena cu nan film Money Zombie’s cu lo representa Aruba na e Festival Internacional cu lo tuma lugar na Corsow proximamente.