Nos ta pidi pueblo nan aporte y comprension
Siman pasa no tabata un siman facil pa Gobierno di Aruba y sigur cu no pa Minister Presidente kende mester a haci e anuncio pa cu aña 2018 pidiendo pueblo un cooperacion. Esaki ta significa curashi y responsabilidad. Berdad ta cu durante eleccion, debi na e informacionnan cu nos tabata maneha na e momento ey, a vocifera cu nos tin e solucionnan practico sin mester pidi pueblo algun cooperacion. Y esaki basa riba informe cu gobierno e tempo aya tabata publica cu nan a logra baha deficit di pais Aruba te na 2% den 2016 y nan lo logra cumpli cu e norma di CAFT den 2017 di -0.5% na deficit cual ta igual na -25 miyon florin. Alrespecto e publicacionnan aki y si nan lo tabata berdad hamas mester a inclui pueblo den e solucion pero lo a logra tur cos cu nos plannan alternativo.
Desaster den Cocolishi
Dia 17 di November Gobierno nobo a huramenta y dialuna 20 di November 2017 tabata e promer dia di trabao. Ora a drenta Cocolishi a encontra un desaster. Tur e wayanan di telefoon corta, computernan a wordo “horta”, drivers ni harddisk di server no t’ey, no tin ningun documentacion, oficinanan cu holor desagradabel. Pues un lugar sin pia ni cabez y no tabatin nada pa bo por cuminsa informa bo mes y traha pa drecha e situacion. A tuma algun siman pa por a cuminsa mobilisa y poco poco e otro banda di medaya tabata saliendo na cla. A hereda un pais na rand di bancarota. Un pais unda 93 cen di cada florin ta comprometi na debe. Mike Eman, Richard Arends y AVP a engaña pueblo cu CITGO. Den presupuesto di Pais Aruba tabata tin presupuesta 73 MIYON di CITGO cual nunca y te cu awe no a drenta. Alaves tabata tin debenan cu AZV, comerciantenan local, ATA y mucho mas cu gobierno a retene nan placa y no tabata efectua pago.
AVP no a cumpli cu e norma di CAFT
Dia 20 di December 2017 mester a trata den Parlamento di Aruba e presupuesto supletorio unda a aproba 130 MIYON cu AVP a malgasta entre otro den campaña. Esaki a trece cune cu AVP hamas a cumpli cu e norma di CAFT 2017 di -25 MIYON. Mester agrega e norma di -25 Miyon riba e -130 MIYON y cu esaki a cera aña cu -155 MIYON di deficit. Tur esaki presidente di CAFT Raymond Gradus a splica dia 3 di Februari 2018 den conferencia di prensa. E malinformacion di AVP na pueblo a trece cune un scenario totalmente diferente. E peso cu a wordo poni riba aña 2018 ta inmenso. Pa culminacion, AVP a firma cantidad di proyectonan PPP y nunca a presupuesta con ta paga esakinan. Tristo ta cu desde 2018 esakinan mester cuminsa wordo paga. Mester paga minimo 20 aña largo na 81 MIYON pa aña y Hospital por ehempel lo wordo paga durante 29 aña na 30 MIYON pa aña. Esaki ta parti di locual gobierno nobo a encontra.
Catastrofe Eman
Na 2009 Aruba tabata paga 116 MIYON na interes pa aña y esaki a alcansa 216 MIYON na interes pa aña 2017, un aumento di 100 MIYON den 8 aña di AVP. 216 MIYON na interes pa aña ta igual na alrededor Afl. 25 Mil florin pa cada “ORA” di dia!! Hopi tristo unda AVP a hiba e pais aki. Gobierno nobo a cuminsa pa corta masha hopi gasto den e aparato gubernamental y tambe den companianan estatal. Na salario di coordinadornan a corta entre otro 28 MIYON den proximo 4 aña.
Finalmente pa evita un KB y pa logra haya Hulanda para banda di Aruba mester a pidi pueblo un cooperacion di 1.5% pa paga PPP y 1% pa BAZV. Cu hopi dolor mester a haci esaki pero nos ta sigur cu nos lo sali for di e “catastofe” EMAN aki y den futuro cercano Aruba lo para firme bek riba su pia y nos yiunan lo goza di e prosperidad di e pais aki. Nos ta DETERMINA pa salba nos Pais Aruba!!