“Die vlieger gaat niet op!”
Parlamentario Endy Croes ta mustra di no ta contento at all cu CAFT y Hulanda. Aunke mester bisa cu tin coleganan na Hulanda reuniendo cu tur e partnernan den Reino pa sondea e mihor manera pa sali for di e debacle financiero cu nos pais ta confrontando. Un debe nacional di 93% di GDP unda 93 cen di cada florin ta comprometi y mester bay pa paga debe no ta saludabel y ta haci casi imposibel pa goberna un pais.
CAFT ta pone presion
Croes ta sigui splica cu esaki sinembargo a sosode bou control di CAFT desde 2015. MEP a laga e debe na GDP na 49% y den 8 aña esaki a redobla. Con por ta posibel cu CAFT y Hulanda a laga Mike Eman lolianan dje estado aki? Croes te hasta ta pensa cu CAFT kisas a coopera den esaki. Den advies di CAFT di 2 di Maart 2018 CAFT ta keda pone presion splicando cu nan lo kier wak un overschot (surplus) prome cu 2021, esta lo kier mira esaki ya caba den 2020 y pues den 3 aña. Momento bo yega un overschot berdad bo debe nacional lo cuminsa baha. Pero esaki no por bay a costo di scrutina un pueblo. Si CAFT a lag’e yega asina halto den e ultimo 4 añanan nos ta exigi pa duna nos minimo 4 aña bek pa yega na un overschot (surplus).
Yamada na Hulanda y CAFT
Parlamentario Croes ta splica cu e flie aki no lo subi. “Die vlieger gaat niet op”. Nos ta mas cu dispuesto pa consulta Nacionnan Uni y mustra nan den detayes con debil e control di Hulanda y CAFT tabata, con nan a coopera pa laga e debe di pais Aruba alcansa 93% y awor bou di un gobierno Social Democrata, unda lo pone e hende central, Hulanda kier ple ‘de braafste van de klas’ presionando un gobierno nobo pa masacra e homber chikito. Nos tin tur cos documenta y lo scoge e canal pa dialoga y yega na entendimiento prome, pero dado caso esaki no haya oido y comprension nos lo mester prepara pa elabora cu “Plan B” unda esaki sigur lo hiba nos for di otro pero lo garantisa menos dolor pa nos pueblo cu no merece e trato aki. P’esey Croes ta haci un yamada na Hulanda y CAFT pa haci lo corecto y lo corecto ta, uno, acepta boso eror y dos, brinda Aruba minimo 4 aña pa cura e herida grandi esta e Mega Debe cu nos a hereda.
