ORANJESTAD – Departamento di Impuesto ta informa cu e clientenan di winstbelasting por pasa busca nan pakete di winstbelasting di aña 2017. E paketenan ta contene e formularionan di declaracion di aña 2017, esta un formulario di declaracion provisional (voorlopige aangifte) y un formulario di declaracion definitivo (definitieve aangifte).
Na unda por busca e pakete?
Por busca e pakete na e edificio anexo di Departamento di Impuesto na Camacuri (drenta na porta number 4). E orario di servicio ta: 8:00 am – 4:00 pm non-stop.
Ta recomendabel pa trece e comprobante di registracion di Camara di Comercio y e persoonsnummer di e empresa pa asina e proceso di otorgamento por bay mas lihe.
Si cliente mes no por busca su pakete
Si cliente mes no por busca e pakete di su empresa, e por apodera un otro persona pa busc’e p’e. Den e caso ey mester duna e representante un carta di apoderacion (machtigingsbrief). E carta di apoderacion no por ta mas bieu cu un luna y e mester indica specificamente cu e ta valido pa busca e pakete di winstbelasting. Lamentablemente Departamento di Impuesto lo no otorga un pakete si no tin e carta di apoderacion.
Procedura pa otorgamento di pakete na un consehero
Ta haci un apelacion na e conseheronan pa manda e lista di cliente hunto cu e cartanan di apoderacion mas lihe posibel via e-mail [email protected]. Pa e lista di cliente ta recomenda pa uza e MS Excel-file ‘Lijst WB-klanten’. Por baha e file aki for e pagina principal di www.impuesto.aw. E fecha final pa entrega e lista di cliente ta 3 di april 2018. Departamento di Impuesto no lo otorga un pakete na un consehero si no entrega e carta di apoderacion delanta. Ora tur cos ta na ordo Departamento di Impuesto lo informa e consehero ki dia e por pasa busca e paketenan di su clientenan.
Departamento di Impuesto ta recomenda pa e cliente y su consehero palabra ken ta busca e pakete y eventualmente prepara e carta di apoderacion pa evita confusion.
Gerencia di Departamento di Impuesto
