ORANJESTAD – Den cuadro di reunionnan di trabao na Hulanda, Minister di Finansa, Asuntonan Economico y Cultura señora mr. Xiomara Ruiz-Maduro a firma un acuerdo importante di cooperacion cu Oficina di Central di Estadistica Hulandes (CBS) y e Oficina di Estadistica pa e islanan caribense. Pronto e otro paisnan tambe lo firma pa asina por yega na intercambio concreto di experticio y informacion den Reino. E meta di e acuerdo aki ta pa e oficinanan di estadistica duna sosten na otro pa optimalisa nan sistema estadistica, door di reinforsa nos departamento di CBS pa asina nos por acumula, procesa y presenta informacion estadistico na manera mas actual, eficiente y profesional na tur e usuarionan manera gobierno, banconan, ratingbureaus, studiante y publico en general.
Colaboracion entre Oficina di Estadista di Aruba (CBS Aruba) y e oficinanan di estadistica di Corsou y Sint Maarten ya ta existi pa basta tempo. Por ehempel asina na 2011, expertonan di Informacion Tecnologico (IT) Arubano di CBS Aruba a brinda asistencia na Corsou den nan Censo y tambe den procesamento di conteo di negoshinan. Adermas tabata tin cooperacion cu Sint Maarten riba diferente areanan. Sinembargo e acuerdo aki ta bay mas leu y a wordo inicia pa e director general Tjark-Tjin-A-Tsoi di Oficina di Central di Estadistica di Hulanda.
Asina por ehempel lo bay tin cooperacion riba e tereno di legislacion, optimalisacion di intercambio di data entre departamentonan gubernamental, tambe intercambio di informacion cu fundacionnan y e sector priva. Ademas hunto ta coordina e forma con datonan ta wordo compila na e forma mas preciso, completo y mas economicamente posibel. Esaki ta relevante pa entre otro e formulacion di e maneho basa riba evidencia y haci proyeccionnan cu ta mas confiable posibel relaciona cu nos Producto Nacional Bruto, e desaroyo di e poder di compra, inflacion, gastonan di salud, proyeccion di e poblacion, necesidad di vivienda y educacion….etc.
Mas areanan di cooperacion ta innovacion, uzo di conocemento y abilidadnan di otro, asina tambe ekipo di tecnologia specifico. Den relacion cu realisacion di investigacionnan den gran escala, manera e estudio di Presupuesto, Encuesta di e Sector Laboral, Conteo di Empresa y dentro di poco un biaha mas un Censo, tambe ta deseabel comparti e infrastructura tecnologico y di informacion cu otro.
Finalmente, e oficinanan di estadistica a acorda pa bay traha den harmonisacion di definicion-, metodologia y schedulenan. Esaki ta un paso importante padilanti, relaciona cu e esfuersonan global pa alcansa e 17 Obhetivonan di Desaroyo Sostenibel (SDG’S).
Minister di Finansa, Asuntonan Economico y Cultura, señora mr. Xiomara J. Ruiz-Maduro ta hopi complaci cu particularmente un di e oficinanan di estadisticanan mas reconoci na mundo, E oficina Central di Estadistica di Hulanda, ta dispuesto pa coopera.
“Despues di tur cos, ta obviamente importante cu organisacionnan manera Oficina Central di Estadistica di Aruba por ehecuta su tareanan di forma optimo pa provee e organisacionnan cu ta elabora maneho cu datonan actual, confiabel y completo” asina e mandatario a trece dilanti.