Ora cu scucha Prome Minister bin dilanti y presenta argumentonan fofo y sin base, e ta splica pa gran parti e forma y sistema di gobernacion cu gobierno di coalicion ta hibando den su prome 120 dianan.
E unico logro cu pueblo por a ripara te na e momentonan aki di su gobierno, ta un sistema di persecucion politico sin piedad cu a tuma luga, caminda centenares di mama y tata di famia a wordo manda cas sin perspectiva economico a corto plaso, cu cantidad di responsabilidad financiero pa busca un forma con pa atende cu esakinan.
Un persecucion cu a inicia den e prome 10 dianan di gobernacion y cu ta continua despues cu gobierno a cumpli mas di 100 dia na poder, tur den un forma sin hustificacion algun y ora cu analisa tur e retironan aki, e unico splicacion claro cu tin, ta cu gobierno di coalicion a manda hende cas pa pone nan hendenan na trabou.
Den diferente sector y departamento, cartanan di retiro a wordo manda pa ehecucion di esakinan y tin carta cu a wordo entrega den oranan laat di anochi, den fin di siman, riba diadomingo, riba caya, ya cu pa e trabou di persecucion, nada ta wordo respeta.
Na departamento di Serlimar a tuma varios medida, entre otro a suspende contractnan di varios grupo, a saca varios personal di oficina manda nan bay traha riba caminda publico y a move vocero di e departamento y a eligi un otro hunta di directiva.
Despues di tur esaki a tuma luga por a ripara cantidad di nombramento di hendenan cu a drenta den Serlimar, pa colmo practicamente tur di un solo partido politico, cu a manda tur hende cu tabata por pa e departamento aki.
Otro grupo di supervisor a ricibi un lista di exigencianan di trabou cu cual ta dificil na lo por cumpli cu esaki, loke a nifica cu nan mester a bandona servicio y otronan a drenta.
Na departamento di DIP mesun cos sosode, retira varios hende y un grupo di miembro di partido POR a presenta un dia pa traha na nan luga y na departamento di City Inspector tambe e mesun desaroyo aki.
Na departamento di DIMAS tambe a manda un grupo di personal cas y na nan luga a drenta otro grupo di sostenedonan di partidonan den gobierno y mesun sistema a wordo impone na departamento di DOW.
Na House of Europe tambe a manda algun trahado cas, tur esaki apesar cu hefe di e departamento a pidi pa nan keda na trabou pero aki un biaha mas fabor politico ta bin na prome luga.
Na diferente departamento cu ta funciona na MFA tambe a mira hende wordo manda cas mientras cu algun dia despues otronan a presenta pa traha, tur di partidonan cu a drenta gobernacion y na Fundacion Lotto pa Deporte, e lucha ta sigui pa trata di nombra un otro hunta di directiva, cu a wordo manda cas apesar cu Hues a prohibi esaki.
E asalto contra huurdonan di kioskonan na entrada di waf di Oranjestad, ainda no a termina ya cu Gobierno of un minister ta sigui insisti cu e huurdonan aki tin cu entrega nan contract bek, sin hustificacion algun y aki tambe ta pa duna hendenan di partidonan den gobierno, e oportunidad pa haya e kioskonan aki pa huur.
Fuera di e departamentonan aki menciona, ainda tin hende ta wordo manda cas cu vacacion y nan no tin fecha pa wordo yama bek pa bin traha, pa despues ripara cu otro persona a tuma nan posicion den e departamento.
Un desaroyo condenabel, ya cu tur hende cu a wordo manda cas, ta hendenan cu ta traha pa progreso y bienestar di nan pais y di nan famia pero aki tin cu bolbe confirma cu e tipo di politica di persecucion aki, semper tabata e base inicial di gobernacion di gabinetenan di MEP den pasado y awor ainda.