Lider di partido AVP, Mike Eman Contrario na gobierno Betico Croes si a duna reconocimento na tur cu lucha pa Aruba

“Awe nos ta para na monumento 18 di Maart c’un sentimento mixto. Cu alegria, cu respet y admiracion pa e trabou grandi cu e pioneronan a haci na inicio di siglo pasa, kendenan a traha di dia y anochi, pa Aruba su bos por yega na La Haya Hulanda, pa Aruba finalmente por a haya reconocimento pa su lucha pa Status Aparte.
Esaki ta duna nos hopi motibo pa ta orguyoso, pasobra ta trata aki di Arubianonan humilde, personanan cu na e momento ey, tabata biba riba un isla hopi isola, un isla cu poco recurso, sinembargo a pesar di tur e limitacionnan ey, tabatin e curashi y vision pa kere den un Aruba autonomo, un Aruba baas den su mes cas.
E tipo di balentia ey, ta haci e pais, ta traha un nacion y awe nos ta para aki pa duna reconocimento na e curashi, balentia y e vision ey.
Na mesun momento nos tin cu bisa cu awe ta un dia tristo, pasobra 8 aña durante di nos gobernacion, nos gobierno cu signatura di AVP, ami como yiu di Shon A, nieto di Henny Eman, a para tur aña na pia di estatua di Betico Croes, dunando honor y merito na e trabounan cu difunto Betico Croes a haci.
Cada aña cu orguyo, c’un sentido di cumplimento, no c’un partido, no cu algun hende, pero e sentido di compromiso cu bo tin como Prome Minister di un pais, pa uni un pueblo, e dia nacional di e pais aki, no ta dia di un bandera politico di ningun partido.
E ta un dia cu ta palpita den curason di nos tur, e amor pa e pais aki. E amor pa tur hende cu ta biba riba e pais aki, sin distincion di rasa, religion y sigur tampoco distincion di partido politico.
Pasobra ora cu nos para como oponente politico di un partido diferente y tin e grandesa pa duna reconocimento na lidernan di otro partido, nos ta haci nos pais grandi, y pesey awe mi ta tristo cu e gobierno di Aruba a dicidi cu e lo no ta para aki na monumento aki, reconoce 2147 Arubiano balente, reconoce Shon A Eman pa su trabou y tur su sacrificio cu Betico Croes mes a haci na bida.
Amigonan laga awe, laga awe ta e inicio pa nos bisa cu un tipo di gobernacion asina, cu ta dividi e comunidad aki, cu ta crea polarisacion den e comunidad aki, cu no ta asumi su responsabilidad, na momento cu bo a wordo eligi, bo a drenta gobernacion y bo ta mira atras tur dia, papia di pasado, en bes di enfrente e retonan di futuro, anto awe para aki nan, laga nos tur bisa cu mesun curashi, cu mesun determinacion di nos grandinan, nos lo lucha pa den e pais aki tin dignidad politico, tin grandesa politico pa bo duna reconocimento na tur cu a contribui na e pais aki, irespecto nan color politico.
Pesey e partido cu a funda aki a base di e sentimento di ta baas den nos mes cas, tin grandesa, pesey e ta surpasa retonan di e pais, retonan di e partido, pasobra den curason, den alma di e organisacion cu ta representa aki awe tambe, tin amor pa pais, tin amor pa e futuro di e pais aki y tin amor pa cada ciudadano riba e baranca aki, irespecto su color politico.
Si gobierno no por tin e grandesa ey, e pueblo lo tin e grandesa ey, y e pueblo lo demostra e grandesa ey dentro di corto, ora cu nos por carga e bandera di Aruba atrobe, cu honor y dignidad, cu union den e pais aki.
Dama- y cabayeronan, mi ta aprecia cu a pesar cu no tin un programa oficial, awe cada un di boso cu a sinti e necesidad pa bin un rato para aki, bin trece testimonio di locual Aruba mester ta.
Danki y laga nos semper reconoce tur hende riba e pais aki, si nan a nace aki of no a nace aki, si nan ta di MEP, di POR, di PPA, di partido RED, di cualkier partido, si nan contribui na e pais aki, mañan nan no t’ey mas, nos mester ta para unda tin simbolo di nan trabou pa duna merito, pasobra esey ta haci pais, esey ta haci nacion, y no division y no meskinidad.
Laga awe ta testimonio di loke hunto nos tin cu haci, carga e bandera, sin distincion, cu amor pa tur hende y cu Dios bendiciona boso y ban sigui lucha, ban sigui marcha, biba Aruba.”