ORANJESTAD – For di aña 2014, Gobierno bou signatura di AVP a entrega na Parlamento 3 presupuesto, 3 presupuesto supletorio, 3 cuenta anual y reportenan di entradanan y gastonan di Pais Aruba pa 10 cuartal consecutivo. Tur e documentonan aki ta den dominio publico y tur cifra den a wordo suministra door di Departamento di Finansa, Departamento di Impuesto, di Aduana y a wordo controla y revisa pa Rekenkamer y Colegio di Supervision Financiero temporario di Aruba, CAFT. “E declaracionan reciente di minister encarga cu finansa publico ta mustra su falta di conocemento of cu e no por,” Sr. Richard Arends, miembro di fraccion di AVP den Parlamento, a declara.
“Ponencianan recien di minister encarga cu finansa publico, esta cu e cifranan no ta cuadra cu realidad, ta mustra mas bien cu e no a hasi su trabow ora e tabata parlamentario. Esaki ta conta tambe pa e gastonan riba termino largo, manera e proyectonan di PPP,” e parlamentario a sigui bisa. Nan tur wordo aproba como ley door di Parlamento di Aruba. “Podise e no tabata di acuerdo cu nan, pero e no por bisa cu loke e ta encontra awor e no tabata sa di nan y cu no tabata tin un cuadro financiero pa cumpli cun’e.”
“E dificit cu nos a laga atras ni mas ni menos cu loke ley di supervision financiero ta prescribi,” Sr. Arends a sigui bisa. Den e periodo prome cu e eleccion e partido mas grandi den coalicion a hiba un campaña bisando e lo tin e solucion pa e retonan financiero e añanan nos dilanti. “Ta straño cu awe minister encarga cu finansa publico ta declara cu cu e la encontra su mes cu sorpresanan pa motibo cu e cifranan lo no ta realistico. Finansa publico ta un di e areanan di maneho cu a wordo scrutina mas cu tur otro. Ademas un ponencia asina ta un falta di respet pa e departamentonan, instancianan y organonan como tambe e profesionalnan cu ta eherce na trabow debidamente”
“Nos ta 6 luna caba despues di elecion y ainda Gobierno no a presenta un plan financiero, ni tampoco un plan economico. Den un carta mi a hasi un peticion na Presidente di Parlamento pa minister encarga cu finansa publico bin parlamento y duna splicacion di kico su plannan ta, en especial kico su plan financiero lo pa logra e norma presupuestario di e aña aki, como tambe pa e e proximo aña”
E spirito di ‘lora manga y traha’ ta completamente ausente den e coalicion actual. Loke nos por a wak te awor ta decisionnan ad hoc cu ta hiba te hasta retractacionan di decision cu den democracianan normal lo a condicui na renuncia di mandatarionan.